Usa ka 33-anyos nga lalaki giingong nipatay sa iyang amahan ug niangol sa iyang maguwang tungod sa away sa yuta sa Sitio To-ong, Barangay Sam-ang, dakbayan sa Toledo niadtong Biyernes sa buntag, Agusto 26, 2022.
Si Senior Master Sergeant Alfredo Barquin sa Toledo City Police Station niila sa namatay nga si Antonio Mercader Sr., 64.
Si Mercader Sr. namatay sa mga samad dinunggaban sa iyang anak nga si Nestor, samtang si Eduard, 39, naangol usab human niya giuwang ang duha.
Si Barquin nitug-an sa SunStar Cebu nga gikomprontase sa suspek ang iyang amahan sa iyang balay kay nisuway og baligya sa ilang yuta nga wala niya mahibaw-i.
Taliwa sa ilang panaglalis, si Nestor nipunit og sanggot ug giatake ang iyang amahan, kinsa armado usab og sundang.
Nipatunga si Eduard pagkadungog sa komosyon apan gitigbas usab siya sa iyang igsuon.
Ang mga biktima gidala sa Toledo City Medical Hospital, diin si Mercader Sr. patay nang niabot.
Narekober sa kapolisan ang mga hait nga hinagiban sa biktima ug sa suspek.
“Wala ra man ang suspek sa nahitabo sa iyang amahan. Grabe niya kalagot siguro nga matud niya wala daw siya nagmahay sa iyang gibuhat nga gipatay ang biktima,” matud ni Barquin.
Kasamtangang gitanggong sa Toledo City Police Station ang suspek, nagpaabot sa kasong frustrated murder ug parricide nga ipasaka batok kaniya.