Niadtong nagsugod pa ko sa mountain biking, layoan na kaayo ko sa Brgy. Guba. Imagine, manggikan og alas 7 sa buntag, moabot og alas 10:30 sa buntag ug usahay, alas 11 pa. Grabeha gyud kahinay ug kadugay nakong tindak. Kalima o kaunom ko mopahuway.
Apan dihang naanad na, nag-anam og ka layo. Diri na ko agi sa Mabini ug modulhog sa Paril.
Kaning tanan puro ni mga bukid sa Cebu City nga duol sa Talamban kay maoy duol sa amoa. Hangtod nga nag-anam o ka layo kay niabot na ko sa Brgy. Sirao, dayon sa Ayala Heights.
Mao na ang sakit sa bikers, mangita og mas layo ug mas challenging nga climb. Dunay uban nga hilig sa trail, mas lisod ang ilang pilion. Magkalayo gihapon.
Ang akong biking buddies nga sila si Ramon, Philam, Embet, Giovanni ug uban pa, mangabot na sa kabukiran sa Danao, Balamban, San Fernando, Carcar ug uban pa. Grabe na ka layo ang Carcar. Sa karsada pa lang daan, back and forth, naa sa 100 kms. kapin.
Busa, ang mga asawa di angay mabalaka o magduda kon nganong dugay moabot ang bana gikan sa biking. Basta magkadugay, ganahan magkalayo ug magkalisod.
Usahay, mohana ka og mahay, pero ang thrill di kabayran og kwarta kay grabe makalingaw. Labina kon daghan ang lisod nga imong maagian sa dalan, gawas sa kahait sa pagtungas nga P1 na lang ang plete padung sa langit.
DUOL RA
Nihinay ko og anam anam tungod sa skin disorder nga karon giila na nga auto immune nga sakit. Kanang gitawag og eczema. Kon naa ka ini, ang init sa adlaw usa sa mga idili nimo kay mograbe. Hapit ko mag usa ka tuig nga nagtago gikan sa adlaw. Katol ug grabe ang kahapdos. Lisod ang pagkatulog kay katol ug hapdos ang bation. Daghan pa ang gidili nga mga pagkaon.
Makausa ka higayon nga nag bike ko nga naabtan ko sa grabeng init, pwerte na nakong puwaha.
Karon sama ra og mibalik ko sa una nakong mga buwan sa biking nga naa ra ko sa duol. Sagad matungas nako ang Brgy. Guba kay layoan na ko sa Busay. Lahi na man sab gud ang landscape karon kon itandi kaniadto.
Gawas pa, lahi na ang agianan padung sa Guba tungod kay duna ka nay mahapit nga mga kan-anan. Di sama kaniadto nga grabehang kamingaw.
Bisan duol ra ang akong gisikaran, nalingaw ra sab ko kay nakapasingot. Lahi ra ang biseklita nga gamiton nga paagi sa pag exercise.
SURVEY
Sa usa ka survey nga bag-ohay lang nga gipahigayon, nakaplagan nga upat sa matag 10 ka balay dunay biseklita. Apan mahibung ka kon nganong makakita ka lang og daghang mga tawo nga magbiseklita kanang weekend ug holiday. Sa ubang mga adlaw, maihap lang.
Kini tungod kay ang mga karsada sa Pilipinas wa gihimo alang sa mga biseklita. Wa gani huna-hunaa pag-ayo ang mga pedestrian. Alang ra ni sa mga sakyanan.
Tan-awa lang gud nang bike lanes sa Cebu City, daghang mga sakyanan nga gababag kay nag park.
Hangtod nga di tinud-on ang paghawan sa bike lanes, wa gyud ni kapuslanan.