Namatay ang usa ka 34 anyos nga steelman human nahulog sa sementong haligi samtang nagtrabaho sa P5 Cebu- Cordova Link Expressway (CCLEX) sa lungsod sa Cordova, Cebu sa Sabado sa buntag, Agusto 27, 2022.
Si PO2 Gerson Futalan, assistant investigator sa Cordova Police Station, niila sa biktima nga si Jonas Batistis, taga Sitio Indian, T. Padilla, dakbayan sa Sugbo, nagtrabaho sa kompaniya sa CLJV. Matud ni Futalan sa SunStar Cebu, kini nahitabo mga alas 8:20 sa buntag.
Si Batistis nagbarog sa temporaryo nga beam support nga huyang uban sa iyang kauban sa trabaho nga si Rolito nga nagtrabaho kay dunay giayo.
Paglabay sa usa ka segundo, natapigas si Batistis ug nahulog sa lapad nga semento nga poste nga gibana-bana sa kapolisan nga mga 70 metros ang gihabugon.
Nitugpa siya sa konkretong bahin sa pundasyon sa haligi sa taytayan. Si Batistis nakaangkon og bali sa iyang tuo nga paa ug sa likod nga bahin sa iyang ulo.
Wala nay timailhan nga buhi ang biktima sa dihang gisusi sa doktor sa kompaniya ingon man sa health and safety security supervisor.
Apan gidala gihapon siya sa kapolisan sa lungsod sa Cordova ngadto sa Carajay Health Center sa dakbayan sa Lapu-Lapu diin gideklarar nga patay na si Batistis.
“ Base sa among imbestigasyon, it was purely accident kay ang statement sa nakakita sa maong panghitabo nga ka trabaho aning biktima, mao sad ang among nakita sa area nga nadisgrasya gyud ni siya,” matud ni Futalan.
Sa lahi nga interbyu sa Superbalita Cebu, si Police Major Michael Gingoyon, hepe sa Cordova Police Station, nikompirmar sa hitabo.
Sa ilang pasiunang imbestigasyon, matod ni Gingoyon nga wa magtaud sa safety harness si Batistis atol sa hitabo.
Apan gimandoan kanunay ang tanang mga trabahante sa kompaniya sa pagtaud niini nga safety equipment kon magtrabaho.
Samtang ang management sa Cebu-Cordova Link Expressway Corp. (CCLEC) niingon nga ila pang susihon ang hitabo.
Apan nitataw nga sila naguol sa kamatayon sa trabahante.
“We are still looking into the incident this morning. We have asked our contractor - the Cebu Link Joint Venture - for an update on the tragic incident. We will share with you updates as soon as we get them. Our thoughts are with the family of the worker. We express our deep condolences and we ask everyone to join us in prayers for his rest and for comfort to his family,” matod sa CCLEC sa ilang giluwatang pamahayag human sa insidente. (dugang taho ni BBT)