Grupo sa militanteng mamumuo sa Sugbo molusad og lihok-portesta karong hapon, Agusto 29, 2022, atol sa pagsaulog sa National Heroes’ Day aron pagdemanda sa proposed national budget alang sa 2023 magtutok sa basic social services, sumala sa ilang press release nga gipadala sa SunStar Cebu.
Si Jaime Paglinawan, chairman sa Alyansa sa mga Mamumuo sa Sugbo-Kilusang Mayo Uno (AMA Sugbo-KMU), nibanabana nga dul-an sa 200 ka trabahante ang moapil sa protest march nga magsugod sa gawas sa Department of Agriculture (DA) office sa siyudad sa Mandaue.
Ang progresibong lider sa grupo nipadayag sa pagsupak sa proposed P10 billion budget alang sa kontrobersiyal nga National Task Force to End Local Communist Armed Conflict (NTF-Elcac) nga iyang gisubay nga hapit modoble kini sa iyang kasamtangang pundo nga P5.6 billion.
Dugang sa ilang press release, supak usab sila sa proposed P718.4 billion budget sa Department of Public Works and Highways (DPWH).
Ang DPWH gisaway tungod sa kahinay sa pagtapos ug kalidad sa proyekto, lakip sa akusasyon sa korapsiyon.
“Kini nga budget dapat i-allocate sa mga nangagubang classroom ug sa pagtukod og additional classrooms sa mga tunghaan. Dapat pud kini gamiton sa pag-hire og mga dugang teachers alang sa pagtubag sa krisis sa edukasyon karon ug dili sa padayong pagdakop ug pagpatay sa mga aktibista ug sibilyan,” matod ni Paglinawan sa press statement.
Ang proposed budgets sa NTF-Elcac ug DPWH lakip sa Department of Budget Management’s proposed P5.268 trillion national budget sa 2023.
Atol sa Duterte administration, ang NTF-Elcac gisaway tungod sa pipila sa iyang mga opisyal naghimo og red-tagging activists, lawyers, journalists, writers ug ubang miyembro sa civil society.
Dugang niya, “Dapat kini nga budget padulong sa sektor sa panglawas aron mahatagan og dugang medical workers. Magamit pud ni alang sa P15,000 production subsidy sa mga mag-uuma ug mananagat, ug ayuda alang sa mga estudyante, sa mga nataktak sa trabaho ug sa mga MSMEs nga grabe nga naapektuhan sa pandemiya sa Covid ug hangtud karon ubos sa kasamtangang krisis, nagkalisod pa gihapon.”
“Dapat makita nato sa aktwal nga ang proposed 2023 national budget sa administrasyon ni Marcos Jr. mopadung sa mga batakang serbisyo alang sa katawhan, mosulbad sa krisis sa ekonomiya, panglawas, ug sa edukasyon, ug motubag sa mga hinanaling panginahanglan sa nagkalain-laing sektor. Batukan nato ang pagpataas sa budget sa mga pasistang mga programa sama sa Barangay Development Program sa NTF-ELCAC nga ilegal nga pagpangdakop ug pagpamatay lang..” dason ni Paglinawan.