Gipirmahan ni kanhi Presidente Rodrigo Duterte niadtong Abril 29, 2022 ang Republic Act (RA) 11717, nga nagpasaka sa kapasidad sa Vicente Sotto Memorial Medical Center (VSMMC) sa siyudad sa Sugbo, gikan sa 1,200 beds ngadto sa 1,500 beds.
Ang VSMMC maoy kinadak-ang ospital sa gobyerno dinhi sa Sugbo.
Gipadak-an tuod ang kapasidad ninii, apan naghuot gihapon ang mga pasyente kay nahimo na kinig han-ukanan sa mga pasyente gikan sa provincial hospitals sa lalawigan sa Sugbo.
Si VSMMC Chief Gerardo Aquino Jr. miila sa nag-unang 10 ka mga hospital sa lalawigan sa Sugbo nga mi-refer sa miabot sa 6,419 ka mga pasyente ngadto sa VSMMC gikan sa buwan sa Enero hangtod sa Hunyo 30, 2022.
Matod ni Dr. Aquino, mao ni ang nag-unang lima ka referring hospitals: DOH 711 hotline (2,294), Lapu-Lapu City Hospital (815), Eversley Childs Sanitarium and General Hospital sa Jagobiao, Mandaue City (732), Cebu Provincial Hospital (CPH) Danao (649) ug Cebu South Medical Center, kanhi Talisay District Hospital (417).
Laing top referring hospitals mao ang Mandaue City Hospital (364 referrals), CPH Carcar (336), CPH Bogo (320), Cebu City Medical Center (CCMC) (253) ug CPH Balamban (239).
Wa mahimuot si Cebu Gov. Gwendolyn Garcia sa pagpahibawo niini ni Dr. Aquino atol sa panagtagbo sa gobernador ug sa mga mayor, opisyales sa Department of Health (DOH), mga municipal ug city health officers ingon man mga representante sa mga district ug provincial hospitals didto sa Capitol Social Hall niadtong Miyerkules.
Ang VSMMC usa ka Level 3 tertiary hospital. Mas daghan ang iyang mga doktor ug facilities.
Ang ubang mga ospital nga nagpadala sa ilang mga pasyente naa ra sa Level 1. Gani, ang Eversley Childs Sanitarium and General Hospital naa pa sa Level 1, matod pa ni Dr. Pythagoras M. Zerna, medical center chief.
Ang CCMC, kansang building wa pa mahuman, ni-refer sab sa ilang mga pasyente ngadto sa VSMMC samtang nag-operate sila ubos sa Level 1.
Panahon na nga ang mga provincial hospitals i-upgrade ngadto sa level 3 aron di na nila ipadala ang ilang mga pasyente sa VSMMC.
Ang gikinahanglan mao ang dugang mga doktor ug facilities.
Kon daghan ra ba ang pasyente, ang ubang pasyente pabalikon na lang sa doktor kay di na maatiman.
Inig balik sa pasyente, ingnon sa doktor, “Karon pa man ka magpatambal nga grabe na ang imong sakit.”