GRUPO sa 105th Base Command sa Moro Islamic Liberation Front (MILF) ang gitudlo nga mga suspek sa pagmasaker sa upat ka tawo alas 12:50 sa udto niadtong Sabado, Agosto 27, sa Pikit, Cotabato Province.
Mga napatay mao sila Kalid Talib Luntayan, 28; Rey Santander Biñas, 47; William Cantones, 41; ug Darwin Cantones, 28, mga molupyo sa Barangay Fort Pikit sa nahisgutang lungsod.
Sumala kang Cotabato Provincial Police Office Director Colonel Harold Ramos nga sakay og motorsiklo ang mga biktima gikan namingwit sa Barangay Silik, apan pag-abot nila sa Barangay Manaulanan sa nahisgutang lungsod giatngan sila og siyam ka mga armadong lalaki ug gipangtigbas ug giratratan gamit ang M14 ug M16 Armalite rifles hinungdan sa kamatayon sa mga biktima.
Gikanayon ni Pikit Chief of Police Major Maxism Peralta nga rido o dumot tali sa Wacan Group ug sa grupo sa 105th Base Command sa MILF ang ugat sa hitabo.
Samtang giila sab ni Peralta ang mga suspek nga mao sila Halid Sapal, Alba Ampatuan, Montaser Guialal, Montaser Palencia, Mohammed Bongkalis, Harbe Dilangalen, Taot Hasan ug laing pang duha nga pulos mga molupyo sa Barangay Bualan, Pikit.
Gihikay na ang pagpasaka og multiple murder sa mga suspek ngadto sa hukmanan.