Grabe ang kaikag sa mga Sugboanon human gibalik sa Kagamhanan sa Lalawigan sa Sugbo ubos sa liderato ni Gob. Gwen Garcia ang 2022 Pasigarbo sa Sugbo. Moabot sa 50 ka mga contingent gikan sa nagkadaiyang kalungsuran ug dakbayan ang ningsalmot niadtong Dominggo.

Mabulokon kaayo ang gipakita sa matag partisipante ug ang mga mananayaw daw sa gihurot nila ang ilang mga kusog aron makita ang kaanyag sa festival nga ilang girepresentahan.

Gilangkat sa Kabkaban Festival sa dakbayan sa Carcar ang korona sa Pasigarbo sa Sugbo karong tuiga. Ang Carcar usab ang nag-una sa street dancing competition ug ritual showdown. Nakuha nila ang special awards sa best in festival jingle ug anaa sa ikatulong dapit sa best in andas.

Kon natural ka lang nga manan-away ini nga kalihokan sama nako, maglisod ta sa pagdeklarar kon si kinsa ang mananaog kay halos tanan nindot kaayo ang gipakita nga performance.

Adunay mga contingent nga kaniadto way naangkon nga pasidungog apan karong tuiga makasurprisa ang ilang gipakita sa mga Sugboanon.

Ang contingent gikan sa mga dakbayan sa Sugbo ug Lapu-Lapu nisalmot isip guest contingents bisan kon di ubos sa hurisdiksyon sa Lalawigan sa Sugbo kay lagi highly urbanized cities naman ning duha ka mga dakbayan. Apan, ang Danao City nga ubos sa lalawigan wa mosalmot karong tuiga.

Politika ba kaha ang hinungdan kay lagi niadtong milabayng eleksyon sa Mayo nag-atbang sila si Gov. Gwen ug si kanhi Tourism Secretary Ace Durano. Kon politika naman lang ang hinungdan, di maayong panag-ingnan kay sa akong obserbasyon sukad nilingkod si Gov. Gwen human sa eleksyon, wa na siya anang pamolitika.

Gani ang contingents sa Camotes Islands nga kasagaran niini di niya mga kaalyado kay ubos sa partido sa mga Durano nangapil na.

Nakita nato ang kadasig sa kabataan nga ningsalmot sa ilang tagsa-tagsa ka festival nga human sa mosobra sa duha ka tuig nitaak sa ilang dakbayan sa Sugbo alang sa kompetisyon.

Akong nadunggan gikan sa mga batan-ong nagsige og post sa social media nga tungod sa Pasigarbo ilang nasabtan ang kultura sa matag lungsod ug dakbayan sa lalawigan sa Sugbo. Viva Pasigarbo sa Sugbo! (josephelvirtubilan@gmail.com)