Magpinaksitay na sab pagbalik ang San Miguel Beermen ug defending champion TNT Tropang Giga sugod karong alas 5:45 sa hapon, Agusto 31, 2022, sa Game 4 aron buakon ang 2-2 nga panagtabla sa 2022 Philippine Basketball Association (PBA) Philippine Cup finals series sa Smart Araneta Coliseum.
Ang Sugboanong higante nga si JuneMar Fajardo seguradong dasok sa determinasyon nga ibangon pagbalik ang morale sa Beermen nga nahugno human kini nakatilaw og dakong kapildihan sa Game 4, 100-87, nga maoy nakatabla sa best-of-seven series.
Sa Game 4 nadawat ni Fajardo ang iyang ikasiyam nga Best Player of the Conference award apan nagmagul-anon ang produkto sa University of Cebu (UC) Webmasters tungod kay napilde man ang Beermen.
Hinuon, aduna pa’y dakong kahigayunan ang lumad nga taga Pinamungajan, Cebu nga maagak ang Beermen sa mas dakong ganti – ang kampyunato.
“Kailangan namin mag-regroup. Tingnan namin kung ano ang mali, at tignan namin kung ano pwedeng i-adjust para maka-bounce back kami,” asoy sa 6-time MVP nga si Fajardo nga napatik sa www.pba.ph.
Dili ikalimod nga anaa karon sa Tropang Giga ang momentum sa series human sa dako nilang kadaugan sa Game 4.
Gawas niini, mas makatutok na sab si coach Chot Reyes sa paggiya sa Tropang Giga tungod kay nahuman na man ang iyang obligasyon isip coach sa Gilas Pilipinas sa 4th window sa FIBA World Cup Asian Qualifiers.