ALANG sa mga nanginahanglan og tabang medikal, sa mga namatyan ug hinanaling ayuda sa mga biktima sa kalamidad ug trahedya, andam kaayong motabang ang buhatan sa Davao City First Congressional District.

Ning bag-o lang ang nasampit nga buhatan pinaagi ni Representative Paolo Z. Duterte midalit og mga ayuda sa kapin 100 ka pamilya nga naapektuhan sa insidente sa sunog sa Barangay 76–A Bucana, Davao City.

Ang First Congressional District Office nagpadala sa ilang mga kawani sa evacuation area aron mag-supply og hinabang sama sa init nga pagkaon (lugaw), grocery packs (bugas, canned goods, binotelyang tubig, gatas, ug uban pang mga kinahanglanon sa adlaw-adlaw), ug pipila ka mga sanitation kits.

Matag nakadawat – tag-iya sa balay, sharers, renter, ug boarders – nakadawat sa hinabang pinaagi ni Rodrigo "Rigo" Duterte II, anak sa batan-ong kongresista. Gipadali ni Rigo ang pag-apud-apod sa mga ayuda aron nga makatabang dayon kini sa mga biktima.

Niadtong Martes sa programang Madayaw Davao nga gisibya sa Davao City Disaster Radio, si City Disaster Risk Reduction and Management Office (CDRRMO) head Alfredo Baloran miingon nga 40 ka mga balay ang naugdaw sa sunog base sa inisyal nga imbestigasyon sa Bureau of Fire Protection (BFP) sa Davao City.

Matud ni Baloran, naglisod ang kabomberohan sa pagpalong sa sunog sa sayo pa tungod sa kalisod sa mga agianan sa lugar. Dugang pa niya nga wala'y mga taho nga namatay o nasamad sa panahon sa insidente.

Si Rep. Duterte miingon nga ang mga apektadong indibiduwal nga adunay kabalaka sa panglawas mahimo usab nga mangayo og medikal nga suporta gikan sa iyang opisina.

Ang First Congressional District Office nanghatag og hinabang bisan kinsa nga nanginahanglan.

Base sa inisyal nga report gikan sa Davao City Social Welfare and Development Office (CSWDO), 20 ka apektadong pamilya ug 64 ka dependents ang kasamtangang gipasilong sa Busna Gymnasium, samtang 149 ka pamilya nga adunay 545 ka dependents ang anaa sa Manggahan Gymnasium.