Diputado: Feeling lawyer usab si Mayor

Diputado: Feeling lawyer usab si Mayor

Atong hisgotan ang usa ka mayor nga nakasab-an sa huwes.

Gikasab-an kay feeling lawyer, gikasab-an kay wa motuman sa order sa huwes. Unsa man kining maong panghitabo?

* * *

Gikasohan ang mayor sa iyang uyoan kay nangangkon nga sila lang ang tag-iya sa usa ka parsela nga yuta nga unta, common o gipanag-iya sa kadaghanan.

Diha untay higayon nga areglohon lang ang maong panghitabo pero arogante kaayo ang mayor.

Imbes mangayo og pasaylo, nihagit na man hinuon nga pakasohan sila.

Tuod man, gikasohan gyod.

Nipagawas og order ang huwes nga kinahanglan mo-file og answer ang Mayor, ug dili motion to dismiss.

Imbes motuman sa maong order, nagpalain ang mayor.

Ni-file og motion to dismiss, gusto niya ang diretso nga pagbasura sa kaso ug wala nay husayhusay pa.

Pero ang nakaanghit, ang mayor mismo ang ni-file ug nipirma sa motion to dismiss. Feeling lawyer pod.

Unya imbes mohatag og bug-at nga rason kon ngano nga ibasura ang kiha ug dili na kasohan, nangasaba ug nanginsulto hinuon sa iyang uyoan.

Pasabot, gawas nga feeling lawyer ang mayor, gaawas-awas pod ang kahambogero ug pagka-arogante.

* * *

Wala mahimuot ang huwes sa gihimo sa mayor.

Gikasab-an kini, aw, gisabonan diay.

Tiaw bay wa motuman sa mando sa huwes ug naghimo-himo lang sa iyang kaugalingon nga depensa.

Sa iyang pagtuo kay mayor siya, mahimo ra niya depensahan ang iyang kaugalingon sa korte.

Nagtuo pod siya nga mahimo siya mangasaba ug manginsulto sa iyang uyoan pinaagi sa iyang Motion to Dismiss.

Bastos pod nga mga pulong ang iyang gigamit, imbes morason gamit ang mga maanindot ug maalamon nga mga pulong.

Gawas nga gisabonan, ug gimaymayan, mimando sab ang huwes nga ideklarar nga “as in default” ang mayor tungod sa wala pag-file og tubag sulod sa adlaw nga tagal gihatag kaniya.

Buot ipasabot, gawas nga nasabonan, naintonses pod ang kaso sa mayor.

Gitagaan og higayon sa huwes ang kihante nga uncle nga moprobar sa iyang kiha pinaagi sa mga ebidensiya ug igo na lang maminaw ug dili na kaapil sa husay ang mayor.

* * *

Mao kini resulta sa pagkarogante sa usa ka tawo.

Siya pa ang nakasala, ug angay unta mangayo og pasaylo ug magpaubos, siya na man hinuon ang hambogero, arogante ug maot og batasan.

Siya na man hinuon ang nangasaba ug nanginsulto sa iyang uyoan.

Unya imbes mayor, ug angayan nga suheto sa diplomasya, mao na man hinuon nag-una nga wala motahod sa huwes ug sa mando sa huwes.

Mao kini ang sitwasyon nga tawgon sa unang panahon og “mirisi.”

* * *

Walay puas ang kanhi gobernador sa pagpangita og paagi nga makakuha og pwesto sa gobiyerno.

Matod pa sa usa ka dakong opisyal sa Malakanyang kaniadtong miaging semana, kanunay manawag ang kanhi gobernador kaniya kay gusto mobalik sa gahom, human sa usa ka tuig gikan sa piniliay.

Bug-at pod ang nagpaluyo sa kanhi gobernador – grupo sa mga negosyante sa Makati.

Pero morag lisod makasulod. Ngano man?

Tungod kay dili gusto ug gilikayan tamas mahimo sa Presidente ang maong kanhi gobernador.

Unsay gitambag?

Gisultian sa opisyal sa Malakanyang ang kasamtangang gobernador nga papaspasan ang mga kaso nga isang-at batok sa maong kanhi gobernador.

Nasayod ang maong opisyal nga daghan kaayo og mga kwestiyonable nga mga transaksiyon ang maong kanhi gobernador ug gusto nila nga masang-at na kini sa korte o sa Ombudsman.

Kon daghan nga giatubang nga kaso ang maong kanhi gobernador, maglisod na siya og balik sa gobiyerno, bisan pa sa kalig-on sa iyang mga backer, matod pa sa opisyal sa Malakanyang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph