Gisunog ang usa ka 84-anyos nga lola sa iyang pamilya kay “makasasala” niadtong Dominggo, Agusto 28, 2022 sa Sitio Palipi, Brgy. Baliwagan, Balingasag, Misamis Oriental.

Ang biktima nga namatay sa 3rd degree burns giila nga si Teofila Cabusas, residente sa dapit.

Matud ni Balingasag Police Station Commander Major Teodoro de Oro, ang 11 ka mga suspek naglakip sa upat ka mga anak, lima ka mga apo, usa ka live-in partner sa usa sa mga anak sa biktima ug igsuon sa nahisgutang live-in partner.

Giaresto na ang pito sa 11 ka mga sakop sa pamilya nga nalambigit sa maong krimen.

Matud ni De Oro, ang usa sa mga nasikop nga apo nga giilang si Crisanto Ercilla, 22, maoy lider sa wa pa mailhing kulto.

Dugang pa ni De Oro, si Crisanto nag-awhag kuno sa iyang lola nga moapil sa iyang kulto. Apan ang biktima nagmatinud-anon sa iyang pagtuo sa Philippine Benevolent Christian Missionary (PBCM).