Gidakop ang 47 anyos nga lalaki pinasikad sa warrant of arrest sa kasong pagpanglugos o rape ngadto sa 17 anyos niyang stepdaughter.
Ang subject sa warrant, kinsang tinuod ngan gipugngan ning mantalaan aron pagpanalipod sa biktima, nasikop sud sa iyang balay kagahapon, Agusto 30, 2022 sa Brgy. Poblacion Occidental, Consolacion, Cebu.
Ang warrant giluwatan ni Presiding Judge Maria Seares sa Family Court, Branch 6, Mandaue City nga pinitsahan og Hulyo 14, 2022 nga way piyansa.
Ang dinakpan gitago sa ngalang Aldo, panday, kinsa naminyo sa inahan sa biktima nga usa ka Overseas Filipino Worker (OFW), diin aduna silay anak lalaki nga nagpangidaron og 5 anyos.
WANTED
Gibutyag ni Police Staff Sergeant Marivic Pepito, imbestigador sa Women Children Protection Desk sa Consolacion Police Station, nga gilugos sa suspek ang biktima niadtong Oktubre 2019.
Naa sa ika-5 nga most wanted person sa station level ang suspek.
Saysay ni Pepito sa SunStar ug Superbalita Cebu nga niadtong Enero 2022, ang inahan sa biktima niuli ug nakamatikod sa iyang anak dalaga nga naglikay sa iyang ama-ama ug dili katulog matag gabii.
Gisukitsukit sa inahan ang iyang anak kon unsay problema niini gumikan sa iyang katingad-an nga lihok. Ang biktima napugos sa pagtug-an sa iyang gidangatan sa kamot sa iyang ama-ama.
GITILAWAN
“Una gimolestya ni siya unya kadugayan naa na gyud penetration kada gabii. Kon matulog na moaksyon ug likay ang bata dayon moana ang suspek nga ‘gisuwayan ra tika og virgin pa ba ka’,” asoy ni Pepito sigun sa pakighinabi niya tali sa biktima.
Niangkon ang suspek nga iyang lugoson ang dalaga sa higayon nga siya mahubog.
Nangangkon pa ang suspek nga nahulog ang pagbati sa iyang stepdaughter ngadto kaniya, kay iya kining hinatagan sa iyang panginahanglan ug gusto.
Apan namatikdan nga na-trauma ang biktima.
Ang akusado kasamtangan nga natanggong sa Consolacion Police Station. (FVQ)