Molanat pa og usa ka tuig una ipahigayon ang 2023 FIBA World Cup apan nagkanayon si Gilas Pilipinas coach Chot Reyes nga aduna na siya’y ideya kon kinsa nga mga magduduwa ang iyang ipaslak sa Final 12 alang sa matag upat ka mga tuig nga kompetisyon.
Nakasulti si Reyes niini human sa kampanya sa Gilas sa 4th window sa FIBA World Cup Asian Qualifiers.
Sa 4th window, nasugamak sa kulbahinam nga kapildihan ang Gilas sa pag-asdang niini sa Lebanon, 81-85, apan mibawi ug namungot sa pag-host niini sa Saudi Arabia, 84-46.
Wala man tuod mohisgot og mga pangalan si Reyes apan labing seguro, nalansang nang daan ang mga puwesto nila ni National Basketball Association (NBA) Fil-Am star Jordan Clarkson ug sa batan-ong Pinoy nga higante nga si Kai Sotto alang sa Gilas nga mohamag sa mismong FIBA World Cup.
Ang FIBA World Cup, diin co-host ang Pilipinas kauban ang Japan ug Indonesia, ipahigayon sa Agusto 25 hangtod Septiyemre 10 sa sunod tuig.
“Yes, there’s still some guys we’d like to look at, but by and large, yeah,” matod ni Reyes nga napatik sa Spin.ph.
Gilauman nga makuha sab sila si Dwight Ramos ug Japeth Aguilar basi sa maayo nilang gipakitang duwa sa 4th window.
“We saw how Dwight and JC played together aside from Kai. So I think that was very important,” pasabot ni Reyes.
“And we also had the chance to test the versatility of the team, sometimes we’d go big with Kai and Japeth together. Sometimes we’d go regular, or sometimes we’d go small when we don’t have our real power forward or a 4 guy on the floor.”
Gituohan nga aduna’y mga magduduwa sa San Miguel Beermen ug TNT Tropang Giga nga madugang sa puwersa sa Gilas sama na lang sa mga Sugboanong sila si San Miguel center Junemar Fajardo ug TNT guard Roger Pogoy.
Sa 4th window, wala’y mga magduduwa gikan sa Beermen ug Tropang Giga nga gikuha sa Gilas tungod kay padayon pa mang nagsangka ang duha ka mga puwersa sa Philippine Basketball Association (PBA) Philippine Cup finals series.
Matod ni Reyes nga kinahanglang pormahon niya og sayo ang puwersa sa Gilas nga mohamag sa 2023 World Cup aron makapangandam sila og insakto alang sa labing dakong tahas nga ilang sagubangon.