GRUPO sa Bangsamoro Islamic Freedom Fighters (BIFF-Karialan faction) ang gitudlo nga suspek sa pagpamanhig sa mga pulis sa Amapatuan Municipal Police Station alas 9:40 sa buntag niadtong Martes, Agusto 30, 2022.
Kini base matud pa sa kanunay nga pagpanghulga sa duha ka mga kumander sa BIFF nga sila Boy Jacket ug Abdulnasser Sabtula ngadto sa kinabuhi sa napatay nga si Lieutenant Reynaldo Samson, chief of police sa Ampatuan Municipal Polcie Station. Apil nga napatay mao ang driver-escort ni Samson nga si Corporal Salipuden Endab.
Sa maong hitabo, naangol sab sila si Police Senior Master Sergeant Reynante Quinalayo, Police Corporal Rogelio Dela Cuesta Jr., ug Police Corporal Clint Marc Dayaday.
Samtang gitaktak sa katungdanan si Police Colonel Christopher Panapan isip maoy Maguindanao Provincial Police Office director.
Ang pagtaktak sa opisyal base sa memorandum nga gipirmahan ni Police Brigadier General Robert Rodriguez sa Directorate for Personnel and Records Management sa Camp Crame.
Gihulipan si Panapan ni Poloce Colonel Roel Rullan Sermese kinsa gikan sa Police Regional Office (PRO)-Soccsksargen. Wala pa mahibaw-i kon asa ibalhin si Panapan.
Daghan ang nagtuo nga gitaktak sa katungdanan si Panapan tungod sa nahitabong pagpang-ambush nga gikamatay ni Samson ug Endab kinsa giingong padulong unta magsilbi og warrant of arrest batok sa wanted person sa Sitio Pasio, Barangay Kapinpilan, Ampatuan, Maguindanao Province.
Padayon pa ang paglutos sa militar ug kapulisan sa grupo sa duha ka mga kumander sa BIFF-Karialan faction.