GRASYA alang sa mga magtutudlo sa mga pampublikong tulunghaan ang gisugyot karon ni Davao City First District Representative Paolo Duterte sa paghatag og tax-exempt nga P2,000 nga allowance kada buwan sulod sa school year alang sa matag magtutudlo sa publikong eskuwelahan aron mabayran ang galastohan sa mga gamit sa pagtudlo ug mga materyales.

Kauban si Benguet Representative Eric Yap, gisang-at ni Duterte ang House Bill No. 3543 aron ma-institutionalize ang paghatag niining P2,000 nga "Teaching Supplies Allowance" nga magsakop sa mga magtutudlo sa publikong eskuwelahan sa basic education sector.

Si Duterte ug Yap niingon nga samtang ang "teaching is a profession that serves as a foundation of all other professions," ang suweldo nga madawat sa mga educators, partikular na ang mga public school teachers, dili motakdo sa mga sakripisyo nga ilang gihimo sa pagtabang sa paghulma sa kaugmaon sa mga kabatan-onan sa nasud.

"Teachers serve as the nation's modern-day heroes—tirelessly providing at par education to the youth and honing them to become valuable members of the society," giingon sa duha ka magbabalaod.

Gitumbok nila Duterte ug Yap nga nakadugang sa kalisud sa pagtudlo kon kuwang ang panudlanan, human nga ang mga galastohan alang sa mga suplay ug materyales, namalit ang mga magtutudlo kinsa migamit na sa ilang kaugalingong kuwarta.

Si Duterte ug Yap niingon nga ang ilang gisugyot nga P2,000 nga cash allowance nagtan-aw kini sa pagsaka sa presyo sa mga palaliton, lakip na ang mga gamit sa pagtudlo ug uban pang may kalabutan nga materyales.

Ang balaudnon nag-ingon nga ang allowance "shall be exempt from income tax."

Nila nga ang cash allowance naglangkob sa pagpalit sa "tangible ug intangible" nga mga gamit sa pagtudlo ug mga materyales alang sa pagpatuman o pagpahigayon sa nagkalain-laing learning delivery modalities (LDMs) "sulod sa school year."

Sumala ni Alliance of Concerned Teachers (ACT) Davao President Reynaldo Pardillo nga dako ilang kalipay sa maong balaudnon sanglit nadungog ang usa sa ilang mga dugay nang gimulo.

Niini, ang kalihim sa Department of Education (DepEd) gimanduan ubos sa balaudnon nga "maghimo ug periodic review sa Teaching Supplies Allowance, nga gikonsiderar ang kasamtangang presyo sa mga gamit sa pagtudlo ug mga materyales, ug, kon gikinahanglan, irekomendar ang gikinahanglang pagsaka sa kantidad sa allowance."

Ang pagpundo sa paghatag sa allowance ipasaka batok sa tinuig nga budget sa DepEd ubos sa General Appropriations Act (GAA), matud sa balaudnon.

Sa pagkakaron, ang paghatag sa cash allowance aron madugangan ang mga galastohan sa pagtudlo sa mga magtutudlo sa publikong eskuwelahan, nga kaniadto gitawag nga "chalk allowance," gihatag base sa mga probisyon nga gipakita sa nasudnong badyet.

Ubos sa 2020 GAA, ang cash allowance mao ang P3,500 kada school year. Kini sa ulahi gipataas ngadto sa P5,000 matag school year ubos sa GAAs para sa fiscal year 2021 ug 2022.

Niadtong Agosto 22, kadaghanan sa mga estudyante sa mga publikong eskuwelahan mibalik sa hingpit sa F2F classes. Hapit katunga sa mga tunghaan sa nasud ang magpadayon sa pagpatuman sa lima ka adlaw nga F2F classes samtang ang uban mipili sa blended learning hangtud sa Oktubre ning tuiga. Gi-require sa DepEd ang tanang pampubliko ug pribado nga eskuwelahan nga mobalhin sa full in-person nga klase sa Nobyembre 2.

"Public school teachers will have to cope with even more expenses to carry out their responsibilities once full face-to-face classes are implemented.

Our proposal will help ease these financial woes," ingon ni Rep. Duterte.