GIHATAGAN og pasidungog sa gobyerno ang duha ka pulis nga napatay, apil na ang lain pang tulo ka kauban nga naangol sa pagpamanhig niadtong miaging adlaw sa Ampatuan, Maguindanao Province.
Mismo si Department of Interior and Local Government (DILG) Secretary Benjamin Abalos ug Philippine National Police Chief Director General Rodolfo Azurin Jr. ang mitunol sa "Medalya ng Kadakilaan" ngadto kang Lieutenant Reynaldo Samson, chief of police sa Ampatuan Municipal Police Station, ug iyang driver-escort nga si Corporal Salipuden Endab.
Samtang "Medalya ng Sugatang Magiting" sab ang gidawat nila Police Senior Master Sergeant Reynante Quinalayo, Police Corporal Rogelio Dela Cuesta Jr. ug Police Corporal Clint Marc Dayaday.
Kahinumdoman nga isilbi unta sa kapulisan ang warrant of arrest batok sa usa ka wanted person sa Sitio Pasio, Barangay Kapinpilan, Ampatuan sa dihang gibanhigan sila sa grupo nila ni Commander Boy Jacket ug Commander Abdulnasser Sabtula sa Bangsamoro Islamic Freedom Fighters (BIFF) Karialan faction.
Samtang gitahasan na ni Bangsamoro Autonomous Region in Muslim Mindanao Chief Minister Ahod Aljads Murab Ebrahim ang Moro Islamic Liberation Front (MILF) nga motabang sa militar ug kapulisan sa paglutos sa duha ka BIFF commander.
Gipasaka na sab ang kasong double murder ug multiple frustrated murder batok sa mga suspek nga padayong gilutos sa mga awtoridad.