Niadtong Agusto 10, 1985, akong gihulagway sa mga radio listener ang pagsunog kang Engr. Rodrigo “Rudy” Maneja, professor sa usa ka kolihiyo sa Cebu City. Walay laing sakop sa media ang didto aron pagsaksi sa maong hitabo. Si Maneja nahimo nakong suod nga higala kay tigpaminawan siya sa mga tulomanon sa DYMF Bombo Radyo nga akong gidumala.
Kanunay usab siyang bisita sa laing programa sa radio DYFX nga gidumala ni anhing Atty. Miguel “Migs” Enriquez nga kanunay maghisgut og relihiyon matag Dominggo sa hapon. Si Maneja pangulo sa relihiyon nga Kahalha Hamasiyak diin ang ilang giampoan mao si Yawah Ellohem.
Sa usa sa mga sibya sa maong tulomanon iyang gipahibawo nga magpasunog siya ug nga dili siya mamatay. Pagka-ugma mibisita siya kanako sa akong opisina ug gibalik nga magpasunog siya.
Iyang gitumbok ang usa ka bersikulo sa Biblia ng maoy hinungdan nga nagka-diskusyon kami kay niadtong panahona usa ako ka born again Christian. Bisan wala kami nagkauyon apan ako gihapong girespituhan ang iyang pagtuo. Human niadto ako nang nakalimtan ang iyang mga giasoy kanako.
Usa ka buntag samtang padulong akong mopauli, gitawag ko sa akong reporter, Tommy Repaso, nga buot makig-estorya kanako si Maneja nga didto sa Plaza Independencia. Sa pag-abut nako sa maong dapit, nakita nako ang pipila nga mga tawo nga naglibut kaniya. Sa dihang iya kong nakita iya kong giduol ug gipahibawo nga magpasunog na siya.
Nianang tungora wa ko motuo nga seryoso siya. Pinaagi sa among mobile unit ako siyang gi-interview live on-air. Human sa interview mitungtong siya niadtong gibanday-banday nga mga kahoy igsusugnod. Usa ka lalaki ang miduol kaniya nga nagdala og duha ka family-size nga botelya nga adunay gisud nga gasolina.
Giligo niya sa gasolina si Maneja. Akong nasayran nga bana kini sa igsuon ni Maneja. Niining tungora akong gialerto ang among estasyon nga magtawag og pulis ug bombero aron makatabang kon unsay mga mahitabo.
Sa unang pagkudlit sa pospuro napawong kini tungod sa hangin. Apan sa ikaduha misilaub na ang lawas ni Maneja apan nagpadayon siya sa pagsinggit sa “Yawah Ellohem” nga wala gayud maninguha nga mapawong ang kayo nga misunog sa iyang sapot ug panit hangtud nga namatay siya mga ala-una sa hapon. Niining tungora napuno na sa mga tawo ang Plaza Independencia ug mga kadalanan nga naglibut niini.
Ang mga pulis ug bombero nga taudtaud nang miabut walay nahimo tungod kay wala motugot ang inahan ug tanang mga sakop ni Maneja nga hilabtan ang patay nga lawas.
Amo pang gipaabut ang alas tres ang takna kay gituhoan sa pamilya nga mabanhaw si Maneja. Apan tungod kay wala man gidala ang iyang lawas sa ilang panimay sa Talisay, sumala sa pamilya nga paabuton nila ang pito ka adlaw kay tingalig mabanhaw siya. Wala na kami nasayran nga balita kabahin sa kamatayon human kini ilubong. (mannyrabacal1144@gmail.com)