Ang Afos Foundation for Entrepreneurial Development Cooperation (AFEDC) gikan sa Germany, mga chamber of commerce ug local government sa Central Visayas nilagda sa memoradum of understanding (MOU) para sa ilang Fish Visayas Project aron mapalambo ang gagmay nga mananagat, micro, small and medium entrepreneurs (MSME) sa Waterfront Cebu City Hotel &Casino, Setyembre 1.
Kaabag sa AFEDC isip ilang partner sa Pilipinas mao ang Cebu Chamber of Commerce and Industry (CCCI), Bohol Chamber of Commerce and Industry (BCCI); Siquijor Chamber of Commerce and Industry Inc. (SCCII); CCCI-Bantayan Islands Chapter, Department of Science and Technology (DOST-7), Department of Trade and Industry (DTI-7) ug Bureau of Fisheries and Acquatic Resources (BFAR-7.
Samtang ang mga local government unit (LGU) mao ang Bantayan, Cordova sa Cebu, Alburquerque, Pres. Carlos P. Garcia, Tagbilaran City, ug Ubay nga pulos gikan sa lalawigan sa Bohol ingon man La Libertad sa Negros Oriental ug mga lungsod sa San Juan ug Siquijor, lalawigan sa Siquijor.
Niadtong Hulyo, ang German Federal Ministry of Economic Cooperation and Development niaprobar sa aplikasyon sa AFOS para sa implementasyon sa proyekto “to promote sustainable fisheries and related food value chains in Central Visayas, Philippines”.
Ang mga Business Membership Organization (BMO) sama sa CCCI,BCCI, SCCII ug CCCI-BIC adunay mandato sa ilang tagsa-tagsa ka Charter aron tabangan ang ilang mga miyembro ug suportahan ang economic development sa ilang tagsa-tagsa ka hurisdiksyon.
Kini maoy Phase 2 sa paglusad sa AFOS diin una silang nipatuman sa proyekto niadtong 2019 nga gilangkoban sa lima ka mga LGU sama sa Tagbilaran City, Pres. Carlos P. Garcia sa Bohol, Ayungon ug La Libertad sa Negros Oriental ug Bantayan sa Cebu.