Hugot ang baroganan ni Mayor Michael Rama sa pagpabiling epektibo sugod niadtong Miyerkules, Agusto 31, 2022, sa iyang executive order (EO) 5 nga naghimo sa face masks nga “non-obligatory” sulod sa territorial jurisdiction sa dakbayan sa Sugbo.
Taliwala kini sa awhag ni Benhur Abalos Jr., kalihim sa Department of the Interior and Local Government (DILG), sa pagpugong una sa pagpatuman sa naasoyng EO.
Matod ni Abalos, importante ang pagpahiuyon sa mga balaud ug polisiya, diin ang pagpatuman niini makabenepisyo sa publiko nga mopalambo sa pagsalig ug kompiyansa sa Nasudnong Kagamhanan.
Nihangyo si Abalos sa tanang local chief executives sa paghunog una sa posibling aksiyon bahin sa maong isyu hangtod ang Inter Agency Task Force (IATF) magkatigom ug matuki kini.
Apan si Rama nipahayag kagahapon, Septiyembre 1, 2022, nga ang EO 5 magpabilin nga epektibo.
“I cannot be deferring the pronouncement because I already signed it,” matod ni Rama.
Tipik sa EO 5 ni Rama nagkanayon, “non-obligatory but a measure of individual self-preservation and protection.”
Gipasabot ni Rama nga ang iyang EO wala hingpit naglibkas sa face masks ug naghimo nga mandatory niini sulod sa health facilities, sama sa mga hospital ug clinic.
Dugang pa, ang EO nagmando sa mga nakasinati sa flu-like symptoms sa pagsul-ob gyud og face masks labina mogawas sa ilang balay.
Si Rama nibutyag nga nagkasulti sila ni Abalos, kinsa niingon nga ang IATF magtigom pa bahin sa maong isyu.
Dugang ni Rama, nikonsulta siya sa iyang mga abogado sa pagtuki sa mga probisyon nga madugang sa kasamtangang EO, aron ma-harmonize sa national policy.
“Dili ko makig-away sa presidente ug sa atoang secretary. Sultian lang ko nila kon unsay amoang ipuno, ipuno nato,” matod ni Rama.
PANGANGKON
Apan sa pamahayag ni Abalos, siya nangangkon nga si Rama nisanong sa paghunong una sa pagpatuman sa EO.
“Mayor Mike agreed to temporarily put this executive order on hold by virtue of my commitment to bring the matter to the IATF for deliberation,” matod ni Abalos, Jr. sa SunStar Philippines.
“In fact, I am going to even further suggest to make Cebu City the pilot implementer of this measure..” dugang sa Kalihim.
SUPORTA
Si Lapu-Lapu City Mayor Junard Chan ug John Eddu Ibañez, executive secretary ni Mandaue City Mayor Jonas Cortes, nagkanayon nga nagtuon sila karon bahin sa paglibkas sa mandatory face masks rule sa ilang areas of jurisdiction.
Ang Mandaue maoy nagpabiling local government unit sa lalawigan sa Sugbo nga wala pa mousab sa ilang face mask rule, lakip sa Lapu-Lapu nga highly urbanized city nga dili ubos sa lalawigan.
Niadtong Hunyo, si Cebu Governor Gwen Garcia niluwat og EO 16, diin naghimo sa pagsul-ob og face mask sa open spaces sa lalawigan nga dili na mandatory, diin nasukwahi sa protocols nga gilatid sa IATF batok sa Covid-19.
Ang EO 16 ni Garcia nahimong nasudnong isyu human ang kanhi kalihim sa DILG supak sa mando apan wala matarog ang baroganan sa gobernador. (SunStar Philippines)