Usa ka 40 anyos nga lalaki nga gituhoang mamarukay gipusil-patay sa Sityo Panaghiusa, Barangay Duljo Fatima, siyudad sa Sugbo kagahapon sa alas 3:10 sa kaadlawon, Septiyembre 1, 2022.
Si Police Senior Master Sergeant Anthony Adizas sa Mambaling Police Station niila sa biktima nga si Macky Semontiza Resorrecion, lumolupyo sa dalan C. Padilla, Barangay Duljo Fatima, siyudad sa Sugbo apan lumad nga taga dakbayan sa Carcar.
Samtang ang suspek nailhan sa alyas nga “Dave”, hingkod, taga Sityo Bayotan, Barangay Mambaling, siyudad sa Sugbo.
Sa imbestigasyon sa kapulisan sa Mambaling, nasayran nga si Resorrecion niadtong tungora naglingkod sa usa ka bangko dihang kalit nga niduol si Dave ug dayong pusil sa biktima, kinsa naigo sa tutonlan.
Dugang sa Mambaling Police, ang biktima gituohan nga mamarukay o ginagmay nga mamaligyaay og gidiling drugas hinungdan nga nagpundo sa dapit.
Ang Duljo Fatima usa sa mga barangay sa dakbayan nga dunay dakong suliran sa illegal drugs.
Ang suspek gituhoang kustomer sa biktima ug posibleng wala nagkasinabot sa gidaghanon sa shabu nga gipalit hangtud nga niabot sa punto nga gipusil ang biktima, sumala sa kapulisan.
Ang kapulisan nagsubay karon sa anggulo sa drugas nga motibo sa krimen.