Nisaad si Presidente Ferdinand “Bongbong” Marcos Jr. sa paghatag og dugang benepisyo sa nurses taliwala sa ilang pagpadayon og serbisyo sa nasod, labina sa risgo nga giatubang sa pagtumaw sa coronavirus disease 2019 (Covid-19) pandemic.

Si Marcos gidapit nga mamumulong atol sa 100th-anniversary celebration sa Philippine Nurses Association(PNA) nga gipahigayon sa Manila Hotel sa Huwebes, Septiyembre 1, 2022.

Matod ni Marcos, walay igong bili sa salapi nga bugti sa pag-antos ug dedikasyon sa nurses panahon sa pagpakigbugno sa Covid-19 nga naghulga sa ilang kinabuhi ug kaluwasan sa pamilya sa paghimo sa ilang tahas ug responsibilidad.

“Thank you, wholeheartedly, for your sacrifices and significant contributions to society,” pulong ni Marcos.

“Sa palagay ko kulang pa ‘yan eh. Medyo hirap tayo sa pondo ngayon kaya’t sa ngayon ganyan lang muna. Pero palagay ko binubuhay niyo ‘yung may sakit, e. Ibang usapan ‘yan, mahirap lagyan ng dolyar, ng piso, ‘yung trabahong ginagawa ninyo,” dason niya.

Ang Presidente nitumbok sa kapin sa P25.82 bilyunes nga allowances nga gihatag sa nurses, base sa Agusto 19, 2022, sukad sa pagsugod sa Covid-19 pandemic sa 2020.

Matod ni Marcos, ang iyang buhatan kanunay nga abli alang sa mabungahon nga dayalogo sa pagtubag sa mga isyu bahin sa nurses ug ubang allied healthcare professionals.

Duhang niya nga nihimo siya og “special note” sa mga hangyo sa pagtubag sa mga isyu sa nursing profession pinaagi sa pagpasar sa bag-ong Philippine Nursing Practice Act.

“This Executive Department together with Congress will work with you to achieve these goals. As part of our goal to raise the profile and improve the working condition of nurses, we seek to address the disparity in salaries between nurses in government hospitals and the private sector,” pasabot ni Marcos.

Usa sa iyang tumong sa pagtubag sa dili patas nga distribution sa nurses sa nagkalainlaing dapit sa nasod pinaagi sa paghimo og sistema sa health facilities, benefits ug pagtubag sa ubang pagpakabana sa security of tenure.

Matod ni Marcos, ang kagamhanan mohimo sa mga programa nga magsuporta sa nagpadayon nga pagpalambo sa Filipino nurses sama sa Nursing Certification Program nga nagpalig-on ug nagsertipiko sa nurses nga dunay nagkalainlaing specialty areas.

Lakip ang Primary Care Workers Certification Program nga mohatag og eligibility requirements, standard competencies, training mechanisms ug certification process sa pagseguro sa ilang kapabilidad ug kalidad sa staffing sa healthcare system sa nasod.

Nipasalig usab siya sa pagsuporta sa leadership courses alang sa public health nurses nga nagtumong sa paghatag sa nurses sa quality health services ug mahimong killed leaders ug managers. / (SunStar Philippines)