Nagdako ko sa lungsod sa Medellin, probinsiya sa Sugbo unya hangtod karon lab-as pa gihapon sa akong panumduman ang mga maanindot ug makamingaw nga kasinatian.
Kahibalo ko nga daghang maka-relate nga ka edad nako o mas maguwang pa ining akong lindog karon labi na akong kaubang mga tinun-an sa elementarya ug high school.
Makahinumdom pa ko nga kada human sa klase, magsugod na dayon among duwa nga bato-lata, takyan, syatong, jackstone, balay-balay, tinda-tinda, Chinese garter, dakop-dakop ug tubig-tubig.
Libre ra mokaon sa mga prutas nga among maagain gikan sa bayabas, sinagwelas, tambis, mansinitas ug sambag.
Wa say kuyaw o hadlok sa una manglaag bisag magdusingot pa mi og katkat sa bagaso, katkat sa kahoy, suok sa kasagbutan maong mapuno among sinena ug amorsiko.
Wala mi fastfood sama sa Jollibee, Mac Donalds o Mang Inasal pero among mga kinaon mas daghan og sustansiya sama sa inun-unang tulingan, utan bisaya, ginataang nangka, tinolang manok, sinugbang isda unya among balon linung-ag nga kamote, linusak nga saging, puto balanghoy, maruya ug pan de coco parisan og ice candy.
Tungod kay lutong bahay man mga balon, wa sab kini preservatives maong panagsa ra mi mangasakit.
Kanang ma Biyernes sa gabii, tulumanon sab namong mga bata ang pagpanumbalay sa silingan nga dunay black and white TV aron motan-aw og kinkoy nga salida. Mangyaka ra mi sa salog unya magpusta-anay kon kinsay makatag-an sa sunod commercial.
Wa mi cellphone o mga electronic gadget, apan daghan mi og panahon ika-duwa ug kukabildo.
Wa sab mi kahadlok nga naay manaway o mosulti og ngil-ad mahitungod namo unya isibya sa tibuok kalibutan kay wa man mauso ang social media kaniadto. Gani among mga diaries tinagoan unya naka lock pa.
Pobreng hamugaway among kinabuhi kaniadto kay kontento ug malipayon ra man mi sa among kahimtang, way libakay, kumpetensiyahay ug indigay. Dungan og kaligo sa uwan, manakop og pasayan sa punong, og mamingwit og isda sa pantalan.