“Migit king nanu man, luguran la ring aliwang mataktak,
Uling ing lugud tatakpan na ing dekalan ding kasalanan.”
~ Mumunang Aklat nang Pedru ¦Dangka 4: Sunis 8
(1 Peter 4:8)
“Dapot luguran la ring kekayung kasalang,
daptanan lang mayap, at pandaman lang alang asaang nanu mang kapalit.
Kanita ing galal yu maragul, at magi kayung anak ning Kakataskatasan,
uling maganaka ya karing alang utang a lub at marawak.”
~ Lukas ¦Dangka 6: Sunis 35
(Luke 6:35)
“Alang takut king lugud.
Dapot ing pantas a lugud tatabi na ing lugud pauli ning takut,
Uling ing takut atin yang suglung king kaparusan.
Ing tatakut e ya maging pantas king lugud.”
~ Mumunang Aklat nang Wan¦Dangka 4: Sunis 18
(1 John 4:18)
“Ing lugud mapibabata ya, ing lugud maganaka ya.
E ya mangarirya, e ya magpangaya, e ya mapagmaragul.
E na la pamakarine ding aliwa, e ya mapanintun para king sarili,
e ya tambing mimimwa, e na gaganakan ning sablang kamalyan.
Ing lugud e ya matula king marawak dapot matula ya king katutwan.
Parati yang manglwalu, parati yang magtiwala,
Parati yang mamasa, parati yang magpumilit.”
~ Mumunang Aklat Ding Korintu ¦Dangka 13: Sunis 4-7
(1 Corinthians 13: 4-)
“Dindam yu na a mesabi,
‘Luguran la ring kapara yu,
at pikasaman la ring kasalang yu.’
Dapot sasabyan ku kekayu,
“Luguran la ring kasalang yu,
At ipangadi la ring magpadusa kekayu,
bang’ting upayang magi kayung anak ning Ibpa king banwa.
Papalyaryan ne ing aldo bang sunlag karing marawak at mayap,
At parala yang uran karing makatud at e makatud.
Nung luguran la ring lulugud kekayu,
Nanung galal ing akwa yu?
E wari ding mangalap bwis antita ing daraptan da?
At nung atwan la ring sarili mung kabalen
nanu ing daraptan yung migit karing aliwa?
E wari agyang ding paganu daraptan da ita?
Magi kayung pantas, inya pin,
Mengari king Ibpa kiing banwa a pantas.”
~Mateu¦Dangka 5: Sunis 43-48
(Matthew 5:43-48)
***
“Alang gawang pamiyaliwa nanu mang gawan mu, ika pa mu rin parati ing kanakung Ginu. Luguran mu ku o lakwan mu ku, kaulan mu ku, o itabili mu ku anti king kaburyan mu dapot ala kung aliwa pang luguran.” Deng sunis a reti meyangu king metung a dalit ning dalise lugud, mipamagatan-“Panginwan ning Lugud”.
Ing awsan tamung lugud keti king pangsaguling labwad pangsaguli mu naman. Lulugud ka uling kaluguran na ka mu naman ning luluguran mu. E mu na balu nung ninu ing minunang linugud. Mekad migmula king mumunang suglap at bala mu ya pin na iti ing tune lugud. Bala mu neng kinabag ka salu inyang mikit kayu sinta na iti, pakamal na iti. Bala mu antita ing ayayalben mu keng sine, TV o keng YouTube at FaceBook videos. Malapaninap mu. Malapaninap pin.
Mekad mu pin kalabas ning panaun, magbayu ya ing metung kekayu o agnan kayung magbayu uling sinawa na kayu king balang metung o menakit ya o menakit kang bayung matimyas a akilala. Ngamu pin, “Babai ning kanakung tagimpan!” o “Lalaki ning kanakung tagimpan!”
Mekad antita mu naman ing panakit mu king o karing minuna mung pelsintan at ngeni kewanyan mu ne uling ala kang ikwang ligaya kaya o likwan na ka uli ning antita mu namang sangkan. Alang pakinabang. Alang apala!
Nanu ita nung e pamangaybugan mu? Isipan mu kabud ing nung nanu ing nabangnan mu king kekang sadya at ngeni likwan mu nang palsintan. Pane namang mali na ing akakit mu kaya. Mesura ne king panakit mu ngeni kabang asne kalagu o asne kasanting inyang bayu kayu mikit at mipalsinta.
Dapot ing lugud a tune at dalise e manaya o mamasang ating kapalit o ablas. Lulugud ya ing tune malugud uli ning likas kaya ing pamaglugud. Matula yang lulugud. Masaya yang lulugud. Ing ikatula at ikaligaya ning luluguran na ya mung kayang pagnasan-ya mu ing kayang inawa, ya mu ing kayang bye-ala nang aliwa pa.
Ing Ginu antita Yang lulugud kekatamu, pati na ring Keyang dalise talasuyu. Dalise la lugud kekatamu ngan. Alang kapalit. Alang kakabiran.
***
Dake Talabaldugan:
milulukub (pangdiwa) abe-abe malulukub o malilingap king indu o pengari o kamaganak; magsanrung king metung a pibale-bale o tuknangan. English – sharing a home, more than a mere house or shelter. Alimbawa king pamangamit: “Agyang pakakalulu la mu ding lipi nang Peping Masaya na la mang milulukub manibat inyang malati la king metung a malating pibale-bale.”
milulukuban (pangdiwa) ating lulukub, lilingap, maningat o magmasabal. English – someone takes care, attends, oversees, tending or watching over. Alimbawa king pamangamit: “Mayap la panugali ding kayanakan nung milulukuban lang masalese karing pengaring tune magmasabal, lilingap at lulugud.”
milulukung (pangdiwa) makapaglukung o agyu nang maglukung. English – gets to curl up, couch, crouch, huddle, hunch, hunker down, scrunch, squat or squinch. Alimbawa king pamangamit: “Dakal na ngening asasaling payung a milulukung at malyaring isalaksak namu keng malating datukanan inya apidala-dala mu la nukarin man.”
***
MIKASING-KABALDUGANG AMANU TAMU
sikoti - pekamarayu at sagad malyaring dasnan a dake ning metung a dane, bage, kabilyan, kegiwan o agya man ing kapanupayan.
kapupusan – tawling-diling dake malyari nang dasnan ning nanu mang bage o bye ning tau o nanu mang bage mabibye o mimiral.
wakas – sikoti, kapupusan ning nanu pa mang bage, bye o kapalyaryan.
kararasnan – sagad o sagaran a malyaring puntalan, lakbayan, paglayagan.
katatawlyan - tawling-diling dake o dane.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.