Niadto ko og SM sa North Reclamation niadtong Biyernes kay duna koy gipalit. Sa akoang pagbalik sa newsroom, akong naagian ang bike lanes nga dunay nag park nga mga sakyanan sa habig sa Brgy. Lorega San Miguel.
Ang mga nagbiseklita intawon misagol na sa karsada bisan dunay gitagana nga bike lanes alang nila.
Makapaguol ug makapasagmuyo kay duna na man unta tay bike lanes, nagtukod og bike patrollers ang Sugbo Bike Lanes Board, yet, ang mga lagda wa napatuman. Basin lisod kaayo ipakatap ang patrollers. Lisod ba?
Kon i-rationalize ang pagpakatap sa bike patrollers nga abagan sa pipila ka mga pulis ug tanod sa nag-unang mga dan, labina sa Imus padung ngadto sa N. Bacalso Avenue, diin daghan ang mangagi nga bikers, mahimo man unta tingali ni kaayo.
Kon seguridad ang kabalak-an sa patrollers, mo-request ang board sa mga pulis ug basin, makaya sa Cebu City Transportation Office (CCTO) ang pagpatrolya sa dapit gikan sa alas 4 sa hapon hangtod sa alas 8 sa gabii.
Mao nang mga orasa nga ting-uli na sa mga trabahante busa mao na ang angay tutokan sa kagamhanan nga mga oras.
Moabag usab unta ang Dept. of Public Works and Highways (DPWH) nga mamahimong epektibo ang bike lanes alang sa iyang primary nga tumong- ang kaluwasan sa mga nagbiseklita ug pagdasig sa populasyon nga magbiseklita.
USIK
Ang paghimo sa bike lanes gigastuhan og labing minos P50 milyunes sa Nasudnong Kagamhanan samtang dunay tugbang nga budget ang Cebu City. Di ni mani nga budget, dako-dako pud nga pundo gikan sa kaban sa kagamhanan.
Mao bitaw nga makahimangod kay sama ra og giusik-usikan ang pundo.
Kanang sayonsayon ra kaayo ang paggasto apan di diay masustenihan ang proyekto. Kalami ra ba tan-awon sa mga programa sa kagamhanan, sama anang gihimong exclusive bike lane sa Cebu South Coastal Road (CSCR) nga 3 kilometros.
Mas maayo man gud unta nga dunay konsultasyon sa nahingtungdang sektor una gipatuman kining proyektoha. Diretso rang gipatuman tungod kay panahon sa pandemic. Ambot kon pila ka milyon ka pesos ang nagamit nga pundo nga kon akoy pangutan-on, pakyas kaayo.
Kutob ra ni sa pang pogi points.
TUN-AN
Unta, maminaw sab ang kagamhanan sa mga sektor nga nagtuon. Sama dinhi sa Dakbayan sa Sugbo. Ang among grupo nagtuon man unsa nga mga karsada ang mahimong mabutangan og bike lanes.
Kanang ordinansa karon nga napasar niadto pang 2014 kadaghanan sa probisyon niana, apil na ang katukoran sa board, inputs sagad sa bikers. Apan makapahimangod kay wa tingali giduso sa Siyudad ang pagtuon nga gihimo.
Aron unta di mausik ang pundo, naay basehanan ang proyekto ug dunay aktibong partisipasyon sa tanang stakeholders, di lang bikers aning bike lanes, but apil na ang mga negusyante ug barangays nga giagian niini.
Panahon na tingali nga manginlabot na si Mayor Mike Rama ani kay sa iyang panahon, ang ideya sa bike lanes nahimugso.