TINGUHA sa mga opisyal sa Bangsamoro Autonomous Region (BAR) nga ang natural gas sa Liguasan marsh pahimuslan na aron ang mga komunidad niini makabangon gikan sa kakabus tungod sa dekada nga armadong panagsangka.
Ang BAR sa Muslim Mindanao nga naglangkob sa daghang mga lungsod sa Liguasan Delta sa sentrong Mindanao, giingon nga adunay natural nga deposito sa gas base sa pahayag sa mga lokal ug langyaw nga eksperto nga maoy labing dako sa Asya.
Si Gerry Salapuddin, administrador sa Southern Philippines Development Authority (SPDA), ug Barmm Senior Minister Abdulraof Macacua naghisgot bahin sa mga potensiyal sa Liguasan Marsh atol sa usa ka miting sa Bangsamoro capitol.
Ang 220,000 ka ektarya nga Liguasan nga gilibutan sa mga probinsiya sa Maguindanao, North Cotabato ug Sultan Kudarat, usa ka lig-on nga komunidad sa etnikong Maguindanaon sa isla.
Si Salapuddin, usa sa mga tigpaluyo sa mga paningkamot sa kalinaw ug kalamboan sa bag-ong gobyerno sa Barmm, namahayag nga ang iyang pakigtagbo kang Macacua nagtumong nga makuha sa rehiyon sa Bangsamoro ang natural resources.
Si Macacua nagsulti nga ang Liguasan Delta maoy tinubdan sa bahandi sa mga komunidad sa Moro, Kristiyanos ug mga lumad sa habagatang Mindanao.
"Kining mga natural resources nga maugmad nga makapadali sa kalinaw ug malungtarong kalamboan sa autonomous region," sigun ni Salapuddin.
Adunay mga molupyo sa mga lungsod sa palibot sa lapad nga Liguasan Delta nga nagkalot alang sa tubig apan kung sindihan nagkalayo gumikan sa natural gas.
Sayo niini, mga tigdukiduki misulay sa paghimo sa mga pagtuon sa mga deposito sa lana sa dagat sa Sulu sa halayong habagatan, apan nihunong tungod sa mando sa mga peace advocacy blocs ug cause oriented groups nga ang eksplorasyon mahimo lamang pagkahuman sa hingpit nga Barmm ug adunay "joint imprimatur" gikan sa Bangsamoro government ug MalacaƱang.
Ang Sulu ug Tawi-Tawi komponenteng probinsiya sab sa Barmm.
Mga kanhi opisyal sa kanhi Autonomous Region in Muslim Mindanao nga gihulipan na karon sa Barmm niadtong 2019, dugay na usab nga nagkompirma nga adunay bulawan ug nickel deposits sa pipila ka mga lugar sa mga probinsiya sa Maguindanao ug Lanao del Sur nga anaa usab sulod sa Bangsamoro Region.
Sila si Macacua ug Salapuddin, atol sa ilang panagtagbo, parehong miila nga ang natural nga mga deposito sa gas sa Liguasan Delta makahatag og kita alang sa rehiyonal ug nasyonal nga panggobyerno ug makahatag og trabaho sa mga molupyo.
Ang Liguasan Delta usa ka catch basin alang sa kapin sa usa ka dosena nga dagkong mga suba nga nagagikan sa mga watershed area sa kabukiran sa Maguindanao, Sultan Kudarat, South Cotabato ug North Cotabato ug Bukidnon sa Northern Mindanao.
Si Salapuddin nagpasalig sa gobyerno sa Barmm, pinaagi kang Macacua, sa kaandam sa SPDA nga suportahan ang mga programa sa rehiyon nga nagtumong sa paggamit sa natural gas sa rehiyon.
"Ang ingon nga mga patigayon makatubag sa kakabus ug kakulang sa pag-uswag sa pipila ka mga lugar sa Barmm," dugang ni Salapuddin.
Si Salapuddin nakigtagbo sab sa education minister sa Barmm nga si Muhaquer Iqbal didto sa Cotabato City.
Nasayran nga si Salapuddin maoy kanhi chairman sa Basilan Revolutionary Committee sa Moro National Liberation Front (MNLF) sa wala pa siya nahimong gobernador sa isla nga probinsiya ug pagkahuman nahimong representante sa Kongreso.
Miingon si Salapuddin nga ang kooperasyon tali sa MNLF ug sa Moro Islamic Liberation Front (MILF) mahinungdanon sa pagpauswag sa malungtarong kalinaw sa mga lungsod sa BARMM nga naguba sa panagbangi.