Walo ka libo nga runners ang punterya sa 7-Eleven Run Series dinhi sa dakbayan sa Sugbo isip pagmarka sa ilang unang physical run sukad sa pagkuyanap sa Covid-19 pandemic.
Ang maong lumba dungan nga ipahigayon sa dagkong mga dakbayan sa nasod, nga mao ang Cebu, Davao ug Manila karong Septiyembre 24 ngadto 25, 2022.
Ang Cebu Leg magsugod ug mahuman sa Cebu Business Park. Ang mga kategoriya mao ang 42-kilometers, 32K, 21K, 16K, 10K, 10K Buddies, 5K, 5K Buddies ug 3K.
Sugdan ang maong lumba alas 11 sa gabii sa Sabado alang sa mga partisipante sa 42K. Sundan dayon kini sa ubang kategoriya ug awarding sa buntag sa Septiyembre 25.
Ang Manila Leg ipahigayon sa Filinvest City, Alabang, samtang ang Davao Leg sa SM City Davao. Ang tinguha sa mga organizer nga makakuha og 40,000 ka runners sa Luzon, Visayas ug Mindanao.
Mipahigayon og media launching ang mga nagpasiugda sa lumba sa Cebu Grand Hotel niining dakbayan. Lakip sa mga misalmot mao si Cebu City Councilor Joel Garganera ug Cebu City Police Office Deputy Director for Administration Lieutenant Wilbert Parilla.
Anaa pud ang mga taga Philippine Seven Corporation nga sila Franciso Gayanilo, Josephine Ferreras, Michelle Saludes, Cristy Cunan ug ang local race director Joel Juarez sa Coco Running.
Ang top three winners sa tanang kategoriya makadawat og cash prizes. Ang labing dako mao ang 42K diin mobulsa og P25,000 ang kampiyon samtang P20,000 ug P15,000 alang sa makakuha sa ikaduha ug ikatulong pwesto.
Aron makarehistro bisitaha ang www.run711.com. Gikinahanglan nga mopakita sa ilang vaccination card ang mga rehistrante agi’g pagsunod sa Covid-19 protocol.
Gilauman nga sadya ug daghang surprisa ang maong lumba sa ilang pagbalik human sa kapin sa duha ka mga tuig nga nalimitahan kini ngadto virtual run tungod sa Covid-19.