MALIPAYONG gianunsyo ni Mayor Junard "Ahong" Chan nga ang Mactan North Reclamation Project sa Lapu-Lapu City mahinayon na.

Mao kini nga proyekto nga ang grupo sa Salug Valley Enterprises and Development Corp. (SVEDC) ang mohimo sa proyekto sa isla sa Mactan.

Kini nga proyekto nga unang gisugdan sa pag-aprobar sa panahon ni kanhi Presidente Gloria Macapagal-Arroyo ug na-award sa 2015 sa administrasyon ni kanhi mayor Paz Radaza, apan nalangay ang pagkompleto sa proyekto tungod sa kaso nga gisang-at sa Lapu Lapu Holdings Corporation batok sa Lapu Lapu City nga niadto lang 2021 nahingpit og basura sa Regional Trial Court (RTC) sa Makati City.

Apan tungod sa aktibong pagsanong ni Chan alang sa kalambuan sa Dakbayan sa Lapu-lapu, mahinayon na kining 400 ka hektarya nga reclamation project nga mas dako pa sa South Road Properties (SRP) sa Cebu City.

Ang SVEDC group maoy joint venture partner sa Siyudad sa Lapu-Lapu giapilan sa Royal Haskoning, Jan de Nul, MVS Architects, ug uban pa mga dagko nga investors sa proyekto.

Gipadayag sa SVEDC isip private joint partner niining Public-Private Partnership o PPP nga proyekto, sila naghinam-hinam na nga masugdan ang maong proyekto.

Si Dr. Noli Igano, Presidente ug CEO sa SVEDC, nagkanayon nga paghuman sa paghimo sa Joint Venture Agreement tali sa Siyudad sa Lapu-Lapu uban sa Philippine Reclamation Authority (PRA), masdali na nilang mapatuman ang proyekto.

Sigun usab niya, ang pagpadayon sa proyekto sigurado nang dili matanggong pa og usab kay hugot ang suporta ni Mayor Chan alang niini.

Gipadayag usab ni Chan ang iyang suporta niining maong proyekto pinaagi sa usa ka post sa iyang Facebook account.

Ang reclamation project makahatag og dakong kalambuan sa Dakbayan sa Lapu-lapu kay momugna kini og investment opportunities ug uban pang mga kahigayunan aron sa pagtubo sa mga negosyo.

Kining maong proyekto usa usab ka pamaagi nga makatampo sa pagsulbad ang giatubang nga mga problema sa Dakbayan sama sa traffic congestion, ug uban pa.

Kini subay usab sa mga platapormi ni Chan aron mas mapalambo ang maong Dakbayan. (REV/PR)