DUHA ka semana human sa pagpadayon sa face-to-face nga klase sa tanang lebel sa akademya, ang City Health Office (CHO) sa Davao nakamatikod og daghang mga kaso sa impeksiyon sa mga estudyante gikan sa daghang mga medical schools sa Davao City.
Si CHO Head Dr. Ashley Lopez, sa pakighinabi sa City Information Office niadtong Lunes, Septiyembre 5, 2022, niingon nga base sa ilang pinakaulahing monitoring, ubay-ubay nga mga medical students ang gikatahong nataptan sa Covid, diin kadaghanan mga fourth year students nga gikinahanglang magpa-swab test sa dili pa tugotan sa pagtambong sa mga klase.
Suma ni Lopez, ang ihap sa mga kaso naglangkob sa moubos sa 10 porsiyento sa tibuok nga populasyon sa estudyante sa Davao City, diin ang mga estudyante mahimong walay napakita nga mga simtomas o nagpakita nga dunay mild symptoms.
"These are seemingly asymptomatic to mild cases so they are not required hospitalization. And most of them mag-undergo lang og (will only need to undergo) seven days of isolation in their homes or quarantining, then after that, they can go back to class," ingon ni Lopez.
Dugang sa opisyal nga ang mga kaso nga na-detect sukad sa pagbalik sa face-to-face nga klase niadtong Agosto 22 dili hinungdan sa pagkaalarma. Matud niya, gamay ra kaayo ang posibilidad nga masuspende ang face-to-face modality sa mga klase tungod sa nataho nga mga kaso sa impeksiyon.
"So far wala man ta'y gina-consider na ingana because although we still have numbers for cases of Covid, dili na man siya grabe. Ma-manage na man nato'g maayo in case naa’y infections gyud," niya pa.
Bisan pabiling boluntaryo ang pagbakuna, subling gipasabot ni Lopez nga hugot nga giawhag sa iyang buhatan ang tanang Dabawenyo, ilabi na ang mga estudyante, nga magpabakuna. Matud niya nga ang siyudad magpadayon sa pagpalihok sa ilang kampanya sa pagbakuna sa mga tinun-an gikan sa tanang publiko ug pribadong tunghaan.
"It's not mandatory that's why we cannot impose na mahimo na siyang requirement sa school, although we highly encourage that even for teachers and admin staff and even parents. We highly encourage them to have their vaccination," butyag ni Lopez.
Ang mga vaccination hubs magamit usab sa mga Dominggo sa tibuok bulan sa Septyembre diin labing menos 600 ka libreng testing kada adlaw ang gihimo sa CHO isip kabahin sa Covid surveillance measures sa siyudad.
Gi-monitor usab sa CHO ang mga kaso sa impeksiyon human sa kapistahan sa Kadayawan. (Uban sa taho sa CIO)