Di na ta mahadlok kon unsay dangatan kon magbiyahe paingon sa usa ka lugar ilabi na kon ang atong adtoan taas nga oras nga anaa ta sa karsada. Karong panahona gikinahanglan nga ipahuway ang lawas og tarong kay kon naay problema, way lugar nga pwede nga makaistambay aron mahiklin nimo ang gibati.

Naa man tinuod ang mga gasoline station nga dunay mga pansayan, apan di kaayo maayo sa pagkaatiman nga gani ang uban gisirhan kay di siya ipagamit.

Maayo lang og kasagaran sa mga mobiyahe nga lalaki kay pwede ra mopatil-is bisan asa apan dako kaayo ning problema sa mga babaye.

Sa atong panukiduki, si Tourism Secretary Christina Garcia Frasco nagpahibawo sa iyang Facebook post kagahapon nga ang iyang buhatan nagtinguha sa pagtukod og mga limpyong pansayan nga itagana sa mga mobiyahe ug lugar nga ilang mapahuwayan.

Nitumbok si Frasco nga tawgon kini nga tourist rest areas nga tukoron sa nagkadaiyang dapit sa Luzon, Visayas ug Mindanao diin anaa niini ang information center ug pasalubong center nga mag-display sa mga local nga produkto, diin ilakip sa pagpakita ang “Filipino artistry”.

Ang tourist rest areas mosagop sa paggamit sa lokal nga mga materyales ug desinyo nga maoy naila natong mga Filipino.

Ang Sugboanang Tourism Secretary nipadayag nga mao na kini ang katumanan sa pasalig ni Presidente Bongbong Marcos nga palambuon ang kasinatian sa mga turista sa ilang pagbisita sa nagkadaiyang mga lugar nga anaa ang turismo sa nasod.

Karong tuiga 10 ka mga tourist rest areas ang buksan sa Department of Tourism (DOT) diin ilang kaabag ang Tourism Infrastructure and Enterprise Zone Authority (TIEZA) uban sa mga local nga kagamhanan sa lukop nasod.

Kadtong mga lugar nga wa maapil niining programa sa DOT angay nga mogahin na sila og pundo ug di na maghuwat pa. Hinuon molantaw na kon asa nga lugar nila buhaton kini ilabi nang maagian sila sa mga turista sa ilang biyahe o ba kaha anaa sa ilang dapit ang turismo.