Duha ka mga managsuon ug ilang kauban nga gipasanginlang nidunggab sa 32-anyos nga lalaki atol sa kagubot sa Sitio Pitogo, Barangay Poblacion, Borbon, amihanang Sugbo niadtong Dominggo sa gabii, Septiyembre 4, 2022, ningtahan sa kapulisan sa lungsod sa Lunes sa buntag, Septiyembre 5.
Ang away giingong nagsugod sa wa pagkauyon sa grupo sa biktima sa sinayawan sa usa sa mga suspek atol sa usa ka disco.
Giila ang mga suspek nga sila si Pablo Doronio Jr., 22; iyang igsuon nga si Ezel, 29; ug Bernard James Modequillo, pulos mga residente sa Sitio Pondol, Barangay Poblacion sa maong lungsod.
Si Chief Master Sergeant Lou Susvilla, chief investigator sa Borbon Police Station, niingon nga nagpaalim sa district hospital sa silingang lungsod sa Sogod ang biktima nga si Jessie Luceño, panadero, nga nagpuyo sa Sitio Galaban, Barangay Poblacion.
Matod ni Susvilla, ang insidente nahitabo mga alas 11 sa gabii human sa disco atol sa kasaulogan sa fiesta sa Sitio Pitogo.
Si Susvilla niingon nga ang grupo sa mga suspek ug ang grupo sa biktima adunay init nga panaglalis sa sayaw. Ang grupo ni Luceño giingong nimando sa usa ka bata sa pagsulti nga dili sila ganahan sa sayaw ni Pablo hinungdang nagkalalis.
Nibiya ang grupo sa mga suspek paingon sa balay sa ugangan ni Pablo, apan gisundan sila sa grupo ni Luceño.
Sa ilang pag-abot, miulbo ang rambol atubangan sa balay sa ugangan ni Pablo. Giingong gidunggab ni Pablo si Luceño sa tiyan ug sa kamot.
Narekober sa mga mirespondeng pulis ang mga tsinelas, mga piraso sa kawayan ug usa ka kahoy sa dapit nga nahitaboan, apan wala nila igkita ang kutsilyo nga gigamit sa pagdunggab kang Luceño.
Human sa pagsurender sa mga suspek, gidala sila sa kapulisan sa Borbon Rural Health Unit aron masusi tungod kay ang tulo ka mga suspek samaran usab ug nabulit sa mga bun-og.
Matod ni Susvilla nga dili sila gustong mapasanginlan nga maoy ningbun-og sa mga Doronio ug Modequillo.
Matod niya nga pasakaan og kasong frustrated homicide ang mga suspek.