Midoble ang gidaghanon sa mga drayber nga nakalapas sa balaud sa trapiko nga nasikop sa Cebu City Transportation Office (CCTO) sa Agusto kon itandi sa Hulyo.
Niabot og 17,569 ka mga traffic citation ticket ang naisyu sa traffic office sa Agusto nga doble kon itandi sa 8,577 sa Hulyo.
Matod sa CCTO nga daghan sila og nasikop nga mga drayber nga nagmaneho nga way lisensya.
Nakasakmit ug naka impound usab sila og 627 ka mga motorsiklo ug 132 ka mga electric bike (e-bike).
Lakip usab sa ilang gi-impound ang 21 ka four-wheeled nga mga sakyanan ug naka clamp og 1,027.
Ang traffic office nanghingusog karon sa ilang kampanya batok sa illegal parking sa kadalanan sa dakbayan busa nagpahimangno sila sa mga tag-iya nga di magtapataka sa pag park.
Sa una lang lima ka mga adlaw sa Septiyembre, 269 na ka mga sakyanan ang ilang na-clamp sa adlaw ug gabii nga pagpatrolya sa kadalanan sa siyudad.
Matod sa CCTO nga ila kining gipatuman aron pagkab-ot sa Singapore-like nga tinguha sa administrasyon ni Mayor Michael Rama.
Busa makapaabot ang mga drayber sa dakbayan sa Sugbo nga estriktong ipatuman sa CCTO ang mga lagda sa trapiko aron makab-ot ang tinguha ni Rama.
Kanunay usab gipahinumdoman ang mga nakalapas sa balaud sa trapiko sa pagbayad dayon sa mga multa aron di kini maabot sa korte nga mosangko sa pagdako sa bayranan.