GI-ANUNSYO sa Davao City Educational Benefit System Unit (EBSU) niadtong Biyernes, Septyembre 2, 2022, nga ang listahan sa mga estudyante nga kwalipikado alang sa educational assistance ubos sa Scholarship on Tertiary Education Program (STEP) nahuman na.

Si EBSU Technical Assistant Emilio Domingo Jr. niingon sa City Information Office, nga kini ang mga scholar nga nakapasar sa final assessment gikan sa dul-an sa 2,300 ka mga aplikante nga mi-apply.

Matud ni Domingo nga 317 ka mga aplikante ang napili base sa ilang grado ug economic status.

"Kanang 2,300 nga mga applicants qualified gyud na pero ang ato gyud nga ginapangita is ang most qualified sa ilahang tanan kay tungod sa limited lang man ang slots nato, sa akong gisulti nga 317 lang gyud ang slots nga available so mao na siya almost 2,000 pud ang wala nakapasok," ingon ni Domingo.

Samtang, gidugang usab niya nga subay sa pahibalo, nga tunga sa adlaw nga orientation ang gitakda alang sa mga bag-ong iskolar.

Si Davao City Mayor Sebastian "Baste" Duterte mipahalipay sa mga bag-ong scholars human sa Flag Raising Ceremony niadtong Lunes.

Gihagit niya ang mga estudyante nga buhaton ang ilang labing maayo aron mapadayon ang ilang kahimtang ug gihangyo sila nga magbuhat og maayo aron mapadayon nila ang ilang mga scholarship.

"Congratulations sa nakapasar sa atoang scholarship program, unta ayuhon ninyo unya ampingan ninyo ang inyohang mga grado para dili mo matanggal pud, unya unta makatiwas gyud mo gamit ang atoang STEP program," ingon ni Mayor Baste.

Ang EBSU bag-o lang nahimong recipient sa 2,000 ka units sa Pocket Wifi donations gikan sa Smart Communications ug ang maong mga donasyon iapud-apod sa mga daan ug bag-ong scholars.

"For the month of September, we plan to distribute it to our new and old scholars, almost 2,000 all in all," ingon ni Domingo. (Uban sa taho sa CIO)