Adunay gitukod nga bag-ong opisina ang kasamtangan nga pamunoan sa Bohol ubos ni Gov. Aris Aumentado nga ang katuyoan mao ang pag-tan-aw sa posibling mga kahiwian sa nakalabay nga administrasyon ubos ni kanhi Gov. Art Yap.
Ang maong opisina gitawag og Office of Government Accountability and Review (OGAR).
Kini gipangulohan ni kanhi Cabinet Secretary Toloy Evasco, isip chairman ug ang iyang mga kauban sila si kanhi City Mayor Dan Lim, Gabriel Ingles, Suceso Arcamo, Macario Delusa, Jordan Pizarras ug Willy Ramasola.
Ang executive director sa Ogar mao si Atty Neil Ochoco.
* * *
Kon imong tan-awon, duha lang sa Ogar ang dili abogado, sila si Evasco ug Ramasola.
Sila si Ingles ug Arcamo mga kanhi huwes. Si Delusa usab kanhi provincial prosecutor sa Bohol. Si Pizarras sukad sa una hangtod karon padayon sa iyang pagpanglaban isip trial lawyer, samtang si Ramasola usa ka prominente nga komentarista sa social media.
Makita dayon dinhi nga kon balaod sa pangurakot maoy hisgotan, makasalig ang katawhan nga adunay kahibalo ug kahanas ang mga sakop sa maong opisina, gawas pa kini nga ang executive director sa Ogar usa usab ka CPA ug practicing lawyer.
* * *
Klaro na lang nga kon magsugod na og ukay sa mga dokumento ang Ogar, daghan gyod sila og posibling makita.
Unsa man kini?
Posibling makita nila ang kwestiyonable nga mga transaksiyones ubos sa pamunoan ni Yap sama sa pagpamalit og mga tipasi sa mais nga wala magamit kay lugos moturok, pagpamalit og mga traktora nga wala magamit kay dako ra kaayo, pagpamalit og mga himan alang sa nagkalainlaing opisina sa Kapitolyo sama sa mahalon nga mga muwebles sa opisina sa gobernador nga gihimo panahon sa Covid-19, ug uban pa.
Buot ipasabot, makasalig ang katawhan nga pusotpusot nga mga kahiwian ang mogawas ug mabutyag ang kamatuoran kon duna silay makit-an.
Walay angay kahadlokan si Yap kay kon nahisubay lang sa balaod ang iyang mga gihimo, makalusot kini sa pag-usisa sa Ogar.
Witch-hunt ba kini?
* * *
Kon adunay anomaliya nga makita ang Ogar, ila kining ipasa ngadto sa Provincial Legal Officer nga si Atty. Handel Lagunay ug mao na kini ang modesisyon sa lakang nga pagahimuon.
Buot ipasabot, recommendatory lang ang Ogar. Moagi pa sa proseso ang mga ebidensiya nga ilang madiskubrehan sa dili pa kini isang-at sa hukmanan.
Bisan pa kon isang-at na kini sa hukmanan, aduna gihapoy proseso nga pagasundon usa pa ipakanaog ang desisyon sa maong kaso.
Buot ipasabot, mosubay gihapon ang tanan sa gitawag og due process.
Sanglit mao pa may pagsugod sa Ogar, nagpaabot ang katawhan sa positibo nga resulta sa maong opisina samtang nipasalig ang Ogar nga mahimo sab moreklamo ang katawhan sa kahiwian sa kasamtangan nga namunoan karon.
* * *
Nindot ang balita nga gibuhian ni Aumentado nga welcome ang mga dagkong negosyante sama sa SM ug Robinsons nga mobukas sa ilang mga negosyo sa Bohol.
Katingad-an bitaw pod nga sa kadugayng panahon unya kusog ug paspas ang pagbukas sa SM ug Robinsons sa ilang mga negosyo sa nagkalainlaing lugar, ngano kaha nga wa man gyoy nahisalaag sa Bohol?
Unsay rason niini?
Aduna bay minilyon nga mga rason nga nagpaluyo niini?