ANG Davao City Environment and Natural Resources Office (Cenro) nagtukod og 30 ka mga estasyon nga gidumala sa 80 ka mga personahe aron mamonitor ang pagdala sa mga quarrying materials sulod sa siyudad.
Kini ang gibutyag ni Cenro-Mines and Geoscience Section Chief Engineer Melody Dapusala atol sa programang Go Clean, Go Green sa 87.5 FM Davao City Disaster Radio (DCDR) niadtong Martes sa hapon, Septyembre 6.
"They monitor quarry tickets during the transport of quarry materials," ingon ni Dapusala sa monitoring stations.
Ang City Mining Regulatory Board (CMRB) mihatag og kinatibuk-ang 113 ka quarry permits sa Davao City sugod Agosto 31, 2022.
Matud niya nga sa 113, anaa sa 86 ang nahatagan og commercial sand and gravel permit; 23 nakakuha sa ilang mga permiso sa pagpuno sa yuta; ug upat adunay limestone permit. Sa 86, anaa sa 63 ang nakakuha og quarrying permit to operate sa Davao River, 20 sa Lasang River, duha sa Matina River, ug usa sa Bayabas Creek sa Toril.
Ang mga construction materials sama sa balas ug graba, sumala pa niya, ang gigamit alang sa mga proyekto sa imprastraktura sa Davao City, sama sa Coastal Road.
Hinuon, matud niya nga ang Cenro nagpadayon sa pagpatuman sa mga "mitigating measures" aron mapreserbar ang mga suba ug ang palibot niini, hinungdan nga gi-regulate ang commercial quarrying sa dakbayan.
Dugang sa opisyal nga kadtong gihatagan og quarry permit kinahanglang mosunod sa terms and conditions sa ilang permit aron malikayan ang pag-abuso sa kinaiyahan.
"Aside from that, they also conduct river bank rehabilitation activities. One requirement for their permit renewal is planting trees along riverbanks as part of the mitigating efforts within their quarry areas," suma ni Dapusala.
Siya usab miingon nga pipila na lamang ka mga lugar ang nahabilin alang sa quarry permit applications. Ang mga bag-ong aplikasyon sa quarry moagi sa Sangguniang Panlungsod.
Si Dapusala niingon nga ang dakbayan kinahanglang maghimo og resource sustainability ug geohazards assessment aron madeterminar kung asa nga quarry area ang aduna pay igong quarry materials. Kini maoy magsusi ug mag-monitor kon ang mga suba makasustiner ba sa mga bag-ong aplikasyon sa quarry permit.
Ang Cenro, isip secretariat sa CMRB, modawat, moproseso, ug mag-evaluate sa mga aplikasyon alang sa quarry permits ug isumiter kini ngadto sa CMRB alang sa deliberasyon ug pagtugot.
Ang Davao City Ordinance No. 0325-15/1814-15, series of 2015 nga mas nailhang "Ordinance Closing Off the City of Davao to Mining Operations" nga nagdili sa tanang matang sa operasyon sa pagmina sa bisan asang lugar sa teritoryong hurisdiksiyon sa siyudad. Ang quarry resources ra ang gitugotan sa siyudad. Ang pagmina sa gold, copper, zinc ug uban pang bililhong mga metal istriktong gibawal.
Kahinumdoman nga si kanhi Davao City mayor Inday Sara Duterte miisyu og Executive Order No. 48, series of 2020, kun "An Order Creating an Inter-Agency Task Group to Address Issues and Concerns on all Commercial and Illegal Quarrying Operations Within Davao City such as but not limited to Earthfill, Sand, and Gravel, and Limestone Quarry Materials." (Uban sa taho sa CIO)