Andam na ang tanan alang sa grand comeback sa Cebu Federation of Beat Journalists (CFBJ) Shoot-For-A-Cause shooting competition.
Kabahin sa tinuig nga selebrasyon sa Cebu Press Freedom Week, ang ikaduhang edisyon sa shootfest ipahigayon karong Septiyembre 11 sa Front Sight Gun Club Inc. sa Barangay Tubod, Minglanilla, Cebu.
Mangulo sa mga motambong sila si Cebu Governor Gwendolyn Garcia ug Police Regional Office-Central Visayas (PRO 7) Police Brigadier General Roque Eduardo DP Vega.
Sa kompetisyon, magsangka ang gatusan ka mga marksman gikan sa nagkadaiyang police units ug ubang law enforcement agencies sa Sugbo.
Ang mga mahiligon sa pusil nga mga sibilyan gipaabot usab nga mo-strut sa ilang mga abilidad ug gamit sa usa ka adlaw nga kalihokan.
Kini maoy ikaduhang higayon nga ang Cebu-based media organization mopahigayon og shooting competition, nga magsilbi nga fund-raising event alang sa kaayohan sa mga sakop niini.
Alang sa kalihukan karong tuiga, ang CFBJ, usa ka organisasyon nga gilangkuban sa kapin sa 100 ka media practitioners gikan sa lehitimong media outfits sa Sugbo, nakig-alayon na usab sa PRO 7.
Dako usab nga nagtabang sa gipaabot nga pagbalik sa CFBJ Shoot-for-a-Cause mao ang Bureau of Jail Management & Penology-Central Visayas nga gipangulohan sa regional director niini nga si Jail Chief Supt. Efren Nemenio.
Si CFBJ President Arnold Bustamante niingon nga kini ang ikaduhang higayon nga ang PRO 7 nakigtambayayong sa CFBJ alang sa usa ka fund-raising event.
Si Retired Major Gen. Albert Ignatius Ferro, kanhi regional director sa PRO 7, maoy usa sa utok sa dihang gilusad ang shootfest niadtong 2020.
“From the previous three days, we have decided to make the fund-raising event a one-day activity since most of our shooting enthusiasts flock to the shooting range on a Sunday which is their most convenient and available time,” matod ni Bustamante, kinsa moapil kanila ni Garcia, Vega, ug Nemenio sa ceremonial shoot.
Ang kita sa kalihokan magsilbi nga suporta nga pundo alang sa emergency ug health program sa CFBJ.
Gawas sa mga tropeyo nga ihatag sa mga mananaog sa lain-laing mga kategoriya, ang NUSTAR Resort and Casino mo-raffle og gift certificate alang sa usa ka overnight stay good for two sa bag-ong giablihan nga world-class hotel sa South Road Properties. (gikan sa PR)