PLANTSADO na ang tanan sa ipahigayon nga plebesito sa pagtunga ngadto sa duha ka probinsiya sa Maguindanao karong Septyembre 17, 2022.
Kini mismo ang gikompirma ni Commission on Elections (Comelec) Maguindanao Provincial Election Supervisor IV Atty. Udtog Tago.
Ang Maguindanao del Norte langkuban sa mga lungsod sa Datu Odin Sinsuat, Sultan Kudarat, Sultan Mastura, Parang, Buldon, Barira, Matanog, Upi, Northern Kabuntalan, Mother Kabuntalan, Talitay, ug Datu Blah Sinsuat.
Samtang ang mga lungsod sa South Upi, Datu Anggal Midtimbang, Talayan Guindulungan, Datu Saudi Ampatuan, Salibo, Datu Piang, Datu Hoffer Ampatuan, Datu Unsay, Shariff Aguak, Mamasapano, Rajah Buayan, Sultan Sabarongis, Shariff Saidona Mustapha, Ampatuan, Datu Abdullah Sangki, Buluan, Mangudadatu Pandag, Datu Paglas, Paglat, Pagalungan, General Salipada K Pindatun, ug Datu Montawal mao sab ang maglangkob sa Maguindanao del Sur.
Kahinumdoman nga ang House Bill 6413, una na nang gisang-at nila kanhi Maguindanao First District Congressman Datu Roonie Sinsuat ug Second District Congressman Toto Mangudadatu.
Matud ni Maguindanao Governor Bai Mariam Sangki Mangudadatu nga panahon na nga mas tutokan ang mga lungsod sa duha ka probinsiya nga mugnaon aron paspasan ang paghatag sa mga serbisyo kon diin kini maoy usa sa mga nag-unang rason ngano nga iya kining gisuportahan.
Gidugang ni Tago nga niabot na sa Davao City ang mga kahimanan sa plebesito ug gitakdang dad-on na kini sa probinsiya.
Moabot kapin sa 800,000 ka mga rehistradong botante ang mohukom sa pagbahin sa probinsiya.
"Yes or No" lang ang tubag sa manual voting, dugang ni Tago.