Si Cebu City Mayor Mike Rama nanghinaut nga matuman ang iyang damgo nga mahimo ang Cebu City sama sa nasud sa Singapore. Adunay wala gayud motuo nga mahimo kini sa mayor samtang aduna usay daghang mipaluyo kaniya. Sumala sa uban nga mas maayo kanang dunay ambisyon o kaha damgo aron dunay himuong paninguha aron makab-ot kini.
Ang mga madudahon mitawag sa atensiyon sa mayor sa mga tawo nga mangatug sa aseras sa siyudad apil na duol sa city hall, spaghetti wires sa kadalanan, lunop ug baha sa daghang dapit sa siyudad, pataka og pagpanglabay sa mga basura, kakuwang sa supply sa tubig, squatters ug kriminalidad.
Kita sayud hinuon nga naninguha ang mayor nga masulbad kining problema sa baha ug lunop pinaagi sa pagtukod sa Gubat sa Baha Task Force diin iya nga gitudlo si kanhi Department of Environment and Natural Resources (DENR) Secretary ug retired General Roy Cimatu ug laing retired general, Mel Feliciano aron moabag kaniya. Sa peace and order, si kanhi Philippine National Police (PNP) chief Debold Sinas nga usa usab ka retired general gitudlo ni Mayor Rama nga Cebu City Peace and Order Council (CPOC) adviser.
Karon giistrikto na sa mayor ang pagpanakop sa malapason sa trapiko, magpataka og labang sa kadalanan ug magpatakag labay sa basura. Hinaut pang gamiton sa mayor ang iyang gahum sa pagdisiplina sa mga malapason sa balaud kay mao kini ang gigamit ni anhing Prime Minister Lee Kwan Yew aron mahimo ang Singapore karon. Naila ang Singapore dili sa mga modernong building ug sa kadako og presyo sa Singapore dollar apan gidayeg ang maong nasud tungod sa disiplina sa mga Singaporean. Angay nga maghiusa ang mga Sugboanon aron matuman ang damgo ni Mayor Rama kay alang kini kanatong tanan.
Sa laing bahin, duna akoy nadawat nga mga balita nga adunay mga tawo ni Mayor Rama nga moundang na og trabaho sa Cebu City hall tungod kay wala na kuno sila makasabut sa pamaagi sa mayor. Sumala nila nga mas gihatagan pa hinuon og konsiderasyon sa mayor ang mga kaatbang nila sa politika kay sa mga naghago sa pagtabang kaniya. Ila usab nga gisaway ang batasan sa mayor nga maminaw ug motuo og intriga. Hinaut pang dili tinuod kining akong nabati gikan sa mga nangreklamo. Sayang.
Dalaygon kining gihimo sa Office of the Senior Citizens’ Affairs (OSCA) nga paglimpiyo sa listahan sa mga senior citizens aron wala nay makapatakag kobra sa financial aid sa mga hamtong. Ang bag-ong OSCA head si Vicente “Enteng” Esmena nipahibawo nga ila usab nga gipaimbestsigar ang mga tawo nga mikobra alang niadtong mga patay na. Sumala ni Teofy Alfar Gutang nga maoy katarungan nga wala usa ipagamit ang cash card sa mga seniors niadtong milabay nga pagpanghatag sa financial aid kay aron ilang malimpiyo ang listahan sa OSCA. Hinaut pang matumbok gayud kining mga malapason aron sila masilotan aron usab magpadayon na ang normal nga pagpanghatag sa financial aid. (mannyrabacal1144@gmail.com)