Kusinero nga naadik sa sugal sa sabong giingong nangawat og motorsiklo ug cell phone sa iyang kanhi amo apan nasikop alas 6:30 sa gabii sa Miyerkulis, Septiyembre 7, sa Brgy. Montañeza, lungsod sa Malabuyoc.

Ang giingong pagkawat nahitabo alas 4:30 sa hapon sa mao nga adlaw sa Brgy. Barangay Malabago, lungsod sa Badian.

Nangayog abag sa kapulisan ang biktima nga Danish national Nekecilyn Roda Gador Sorensen, 66, minyo, taga Brgy. Malabago, tag-iya sa Cuestas Beach Resort human giingong kawata ni Jose Ponteres San Pablo Jr., 40, kanhi chief cook sa resort, ang motorsiklo ug cell phone.

Si Police Staff Sgt. Dennis Sun, imbestigator sa Badian Police Station nga nahinabi sa Superbalita Cebu, nagkanayon nga si Sorensen nialigar nga gikawat ni San Pablo ang ilang motorsiklo nga Honda Beat ug cell phone.

Sa follow up operation sa kapulisan, nasikop ang suspek sa iyang balay sa Brgy. Montañeza.

Nabawi sa kapulisan ang motorsiklo ug cell phone ni Sorensen.

Matud ni Sun nga si Sorensen nibutyag nga sa milabay nga semana gitaktak na niya ang suspek gumikan sa pagpabadlong.

Gibutyag niya nga sa wa pa niya taktaka, nangayo og abag niya si San Pablo kay giingong nakadasmag siya og bata ug naospital.

Giingong nanginahanglan ang pamilya og P25,000 alang sa hospital.

Tuod man, nihatag ang langyaw aron matabangan sa suspek ang giingong biktima ug dili sab mapriso si San Pablo.

Apan nahibaw-an na lang ni Sorensen nga walay nahitabo nga disgrasya ug wala naunsa ang motorsiklo.

“Nahibaw-an nila nga nabuang sa sugal sa manok ang suspek. Sigeg kapildi maong naputos sa utang,” dugang ni Sun.

Tungod niini gitangtang ni Sorensen si San Pablo sa trabaho, apan gikawat na hinuon ang motorsiklo ug cell phone.

Matod ni Sun grabe ang pagkabuang sa suspek sa sabong kay bisan asa na lang kini nga lungsod mopusta kon dunay tigbakay o derby.

Si San Pablo pasakaan og mga kasong carnapping ug qualified theft.