Ang Konseho sa Dakbayan sa Mandaue moamendar sa ordinansa sa face mask sa higayon nga maaprobahan ug moluwat na og kamandoan si Presidente Ferdinand “Bongbong” Marcos Jr. human sa rekomendasyon sa Inter-Agency Task Force for the Management of Emerging Infectious Diseases.
Mao kini ang gipahibawo ni Mandaue City Vice Mayor Glenn Bercede sa mga sakop sa media sa Huwebes, Septiyembre 8, 2022, human ang IATF nirekomendar sa paghimong optional sa pagsul-ob og face mask sa mga bukas nga lugar.
Matod ni Bercede nga huwaton una sa Konseho ang direktiba sa IATF.
“Labing maayo nga naay approval gikan sa DOH (Department of Health) ug DILG (Department of the Interior and Local Government) before mi molihok. But that’s great news,” matod ni Bercede.
Sa kasamtangan, gihangyo sa Kagamhanan sa Dakbayan ang katawhan nga sundon ang ordinansa sa face mask sa Siyudad samtang wala pa kini naamendahan.
Ubos sa ordinansa, ang mga madakpan nga wala nagsul-ob og face mask sa publikong mga lugar pamultahon og P5,000.
Kaniadtong Lunes, Septiyembre 5, si Mandaue City Mayor Jonas Cortes niingon nga ang Dakbayan nipili sa pagpabilin sa face mask ordinance agi og pagkonsiderar sa mga sugyot sa lokal nga health officials.
Kini human nipadayag si Cortes sa iyang tinguha nga usbon ang ordinansa sa dihang gipirmahan ni Cebu City Mayor Michael Rama ang Executive Order (EO) No. 5 nga dili obligado ang pagsul-ob og face mask sa open space sa dakbayan sa Sugbo.
Gipirmahan usab ni Rama ang EO 6 nga nagtakda og trial period alang sa polisiya gikan sa Septiyembre 1 hangtod sa Disyembre 31, 2022.
Usab, ang Lalawigan sa Sugbo maoy unang nagpatuman sa opsyonal nga face mask policy sa open spaces niadtong Hunyo human gipirmahan ni Cebu Governor Gwendolyn Garcia ang EO 16 ug nipasar ang Provincial Board og ordinansa aron pagpalig-on niini.