Nobenta y dos anyos na akong iyaan nga si Nene apan di gihapon pa pilde og peri sa mga batan-on labi na kon maghisgot og fashion ug pagwapa. Gani, gihimo siyang idolo sa iyang mga apo kay kusog pa man mokiay-kiay ug cha-cha.
Apan sa tinuod lang, wa na gyod mo rekomendar iyang doctor sa paghimo og mga kalihukan nga delikadong maka bali sa iyang huyang nga kabukugan kay nagkaanam na baya ka seryuso iyang osteoporosis ug osteo-arthritis.
Dugang tambag sa iyang doctor ang mosunod:
Di mo kumpiyansa og tungtong ibabaw sa lingkuranan o stool bisag unsa pa kini ka mubo.
Likayan ang paggawas-gawas sa balay labi na kon mag-uwan kay dangog ang palibot.
Pagmatngon kon mogamit sa kasilyas o maligo kay delikado kini sa slide. Seguroa sab nga limpyo ug di dangog ang salog labi na sa may kusina una matulog.
Kon mobangon sa tungang gabii, pasigaon una ang suga una motindog aron makita ang agi-anan.
Kon mosakay og bus o jeepney, likayi ang daghan ug nagdasok nga mga pasahero aron di madam-agan, mabun-og o mapiit ba hinuon. Angay sab palabihon og palingkod ang mga senior citizen para mapahimutang og insakto.
Imbis mga medical supplement ang tomaron o imnon, mas maayong mokaon og insaktong pagkaon nga daghan og calcium sama sa soy products, dairy products lakip panit sa mga gagmay nga pasayan kay taas kini og calcium content.
Kon mahimo ug makaya pa atimanon ang kaugalingon, likayi ang pagpangipon og puyo sa imong mga anak o paryente para naa pay kagawasan nga mohimo sa mga kalihukang makapalipay ug makalingaw nimo.
Buhata ang mga butang nga gusto nimong buhaton, suroy ug kaon sa mga pagkaong imong gusto basta di lang sab palabihan.
Kon ugali masakit, duol gilayon sa doctor aron ma-agapan og sayo.
Palanggaa imong partner kay sa ngadto-ngadto siya ra ang isog ug masaligan nga molahutay og atiman nimo sa imong kiliran.
Ayaw ikumpara imong kinabuhi ug pamilya sa uban kay ang atong pagpuyo di man lumba.
Life is short busa enjoy lang.