Ang Department of Health sa Central Visayas (DOH 7) nipasidaan sa publiko sa di pagkaligo ug paghimo sa susamang mga kalihokan sulod sa kabaybayonan sa Barangay Catarman, lungsod sa Cordova tungod sa taas nga fecal coliform level.
Si DOH 7 Director Jaime Bernadas niluwat sa pahimangno sa Septiyembre 8, 2022, nunot sa hangyo ni Cebu Provincial Administrator officer-in-charge Prince Lee Balaba alang sa pag-isyu og health advisory kalabot sa updated inspection report nga gisumite sa Environmental Management Bureau (EMB) sa Department of Environment and Natural Resources (DENR).
Si Cebu Governor Gwendolyn Garcia niluwat niadtong Agusto 29 og Executive Order (EO) 25, Series of 2022, nga nagdili sa operasyon ug paggamit sa mga illegal structure, sama sa floating ug fixed cottages, sa kadagatan sa lungsod aron mahatagan og dalan ang rehabilitasyon sa lugar.
Atol sa stakeholders meeting sa Cordova Sports Complex niadtong Agusto 17, gihatagan ni Garcia ang mga floating ug fixed cottage owners sa lungsod hangtod Agusto 28 aron maka-operate.
Siya niingon nga ang kadagatan sa Cordova kinahanglang i-rehabilitate human ang lebel sa fecal coliform sa maong lugar milapas na sa limit.
Ang polusyon sa maong dapit giingong tungod sa unregulated nga pagtukod og mga cottage sa dagat ug daplin sa kabaybayonan.
Gawas sa taas nga lebel sa fecal coliform, nga lapas sa maximum allowable level, si Bernadas miingon nga ang DOH 7 assessment team nakaobserbar usab nga ang maong mga estraktura adunay dili maayo nga mga sistema sa paglabay sa hugaw ug wastewater, nga nakalapas sa kasamtangan nga Sanitation Code standards.
“While we caution the public from swimming in the affected coastal waters, we assure that the DOH, DENR, and the local government unit of Cordova are in prompt coordination with the operators of these structures to ensure compliance with sanitation standards and regulations,” matod ni Bernadas.
Dugang niya nga posibleng ma dehydrated ang usa ka tawo tungod sa pagkawala sa electrolyte sa higayon nga dili matambalan, hinungdan nga iyang giawhag ang publiko nga makasinati sa bisan unsang nahisgutang sintomas nga magpakonsulta dayon sa ilang doktor.
BANTAYAN
Sa laing bahin, si Garcia nipagawas usab og duha ka mga executive order niadtong Huwebes, Septiyembre 8, kabahin sa illegal structures sa easement ug foreshore zones sa lungsod sa Bantayan, mga isla sa Bantayan.
Usa niini mao ang Executive Order 30, nga nagmando sa tanang tawo sa paghunong ug paghunong dayon sa pagtukod og mga illegal structure sulod sa gitakda nga easement ug foreshore zones sa Barangays Baigad, Sillon, Tamiao, ug Atop-atop sa lungsod.
Ang ikaduha mao ang Executive Order 31, nga nagmando sa tanang hingtungdan nga tag-iya o claimants sa pagguba sa ilang mga abandoned, unoccupied, o obsolete illegal structures, lakip na ang mga alad sa baboy, kasilyas ug septic tanks sulod sa gitakda nga easement ug foreshore zones sa gihisgutang mga barangay sa lungsod sa Bantayan sulod sa duha ka semana gikan sa Septiyembre 8 hangtod sa Septiyembre 22, 2022. /