FACE Mask Ordinance nga gipatuman sa Dakbayan sa Davao dili pa matangtang, luyo sa posibleng kamandoan sa Inter-Agency Task Force (IATF) nga puwede nang di magsuot niini.
Kini ang gibutyag ni Acting Davao City Health Officer Dr. Ashley Lopez atol sa I-Speak Media Forum niadtong Huwebes, Septiyembre 8, 2022, diin suma sa opisyal nga sa pagkakaron, ang pagsul-ob og face mask sa dakbayan pabiling higpit pang ipatuman.
"We are still imposing the mandatory wearing of face mask because it is what is stated under our city ordinance, unlike other provinces and cities nga wala sila'y ordinance. They just follow the IATF but for Davao City, we are unique because we have this ordinance to follow and impose," ingon ni Lopez.
Dugang pa niya nga samtang ubos ang community transmission sa siyudad, wala pa mahuman ang kampanya batok sa Covid-19.
Si Lopez niingon nga ang dakbayan, as of September 7, 2022, nakatala na og 114 ka bag-ong kaso sa Covid-19 ug taas kini nga ihap kon itandi sa pagsaka niadtong Enero 2022.
Ang siyudad adunay total nga 610 ka aktibong kaso sa Covid-19. Ang sinemana nga rate sa pagkaayo taas sa 96.5 porsiyento.
Gipasabot ni Lopez nga ang mga kaso sa siyudad "very manageable" tungod kay 96 porsiyento sa mga kaso asymptomatic o mild lamang.
"That means that we do not have to worry about hospitalizations. In fact, the utilization rate of our hospitals is quite low, around 30 percent," ingon niini.
Dugang pa niya nga wala silay namatikdan nga post-Kadayawan surge tungod kay nisaka na ang mga kaso. Ang pito ka adlaw nga moving average sa siyudad nagpabilin nga anaa sa 76 ka kaso kada adlaw.
"Medyo marami but I would not say it is a surge because if you look at the trend of our growth curve nasa plateau lang siya. We are having this for the past seven weeks already," ingon ni Lopez.
Giawhag ni Lopez ang mga Dabawenyo nga sundon ang rekisitos sa pagsul-ob og face mask, ug pagmentinar usab sa bentilasyon, ilabi na sa mga trabahoan tungod kay kini nga mga lugar nga mahimong tinubdan sa transmission.
Giawhag usab ang pagbakuna ug aron mo-increase ang coverage, diin ang pagbakuna sa Dominggo gikonsiderar alang sa mga dili bakante sa weekdays.
Ang eskedyul sa pagbakuna mahimong ma-access sa Facebook Page sa City Government of Davao. (Jeepy P. Compio/CIO)