ANG City Health Office hugot nga nakig-alayon sa Overseas Workers Welfare Authority (Owwa) ug Bureau of Quarantine (BOQ) aron ma-monitor ang mga biyahero gikan sa gawas sa nasud.
Si Davao City Health Office Head Dr. Ashley Lopez, atol sa I-Speak Media forum nga gipahigayon niadtong Huwebes, Septyembre 8, 2022, miingon nga ang hugot nga koordinasyon kabahin sa pagpangandam ug plano sa pagtubag batok sa monkeypox diin gipahimutang nang daan kini, usa ka bulan ang milabay.
"We have established a health protocol already just in case, and we have been coordinating with the BOQ and Owwa kay kadtong atong mga travelers particularly from outside the country are being well monitored," ingon ni Lopez.
Si Lopez niingon nga samtang adunay upat ka kompirmadong kaso sa National Capital Region (NCR), wala pay kompirmadong kaso sa monkeypox sa Visayas ug Mindanao.
Matud niya nga ang siyudad adunay mga pasilidad nga makasulbad sa mga kaso sa monkeypox.
"We have prepared an isolation facility intended only for monkeypox and right now we are intensifying our IEC with the conduct of training for both government and non-government constituents," ni Lopez.
Gitaho sa opisyal nga usa ka gidudahang pasyente sa monkeypox nga usa ka hamtong nga lalaki ang gipadala sa Southern Philippines Medical Center (SPMC) alang sa isolation niadtong miaging semana.
Ang pasyente nagpakita og mga sintomas nga susama sa monkeypox, apan sa resulta sa reverse-transcription polymerase chain reaction (RT-PCR) test sa pasyente, nagnegatibo kini sa monkeypox. (Uban sa taho sa CIO)