Ning nagkagrabe ang kahimtang sa panahon ug mga ekonomiya sa kalibutan ug molaygay pa og dugay ang gubat tali sa Russia ug Ukraine, kining presyo sa gasolina di pa ni mao. Tinuod nag rollback ang presyo tungod sa paghinay usab sa dagkong mga ekonomiya.
Dunay mga kabalaka sa recession sa kalibutan, busa, dunay paghinay sa pagkonsumo sa lana. Apan karong winter, mosaka ang panginahanglan sa mga nasod nga mag snow ug kadtong grabe katugnaw. Nanginahanglan sila og lana. Busa, posibleng momahal.
Kaniadtong maoy pagsugod nako og motorsiklo, dako na kaayo ang P92 nga akong matubil sa matag tulo ka adlaw. Dayon niabot na og P130 hangtod nga niabot ang pandemic. Nibarato og balik ang presyo sa oil.
Sa paggamit nako sa Nmax, di kaabot ang akong tubil og P300 matag lima ka adlaw. Grabe ang na save namo sa akong asawa. Makwenta man gud nimo nga sama og taxi ang pagsakay og motorsiklo, minus sa atop ug aircon, but mas dali sa biyahe.
Karon nga mahal ug hayan momahal pa ang presyo sa oil, mas maayo ang biseklita nga alternatibong transportasyon.
NGANONG BIKE?
Una, makatabang ka sa environment kay kon dunay makina ang imong sakyan, mobuga man ni og carbon dioxide ug uban pang chemical compound nga makadaut, di lang sa environment, kon di sa tawo. Mas minus ang mga makina sa karsada, minus usab ang pollution.
Namatud-an na ni sa Dept. of Environment and Natural Resources (DENR) nga nibutang og mga ekipo nga nagsukod sa pollution level sa mga karsada. Mas daghang sakyanan nga mangagi, mas taas ang level sa pollution.
Ikaduha, makadaginot ka sa gasto sa gasolina. Imagine, pila ang imong ma save kon magpatubil ka og P300 kada semana. Maayo lag kana ra. Huna-hunaa kon pila ang imong ma save.
Kana nga budget mahimo nang ipalit og karne aron maluto og mga duha ka adlaw nga pangsud-an. Sa pamilyang yano kaayo, dako na kini og matampo.
Mas maayo pa ni sa panglawas kay mag burn ka og calories. Naa pa ni maayong impact sa psychological nga aspeto sa panglawas.
WA MAGSALIG
Ang nakaanindot sa biseklita kay di ni dependent sa supply sa gasolina ug kuryente. Gawas kon naggamit ka og electric bike, sama anang mga mountain bike sa rich, magdepende gyud na. But kon sama ra sa traditional nga biseklita, wa ni mag-agad.
Kon mabuslot, mahimo ra og tauran nimo og patch, sama nako sa una. Molanat pa og almost a year una pa mobigay ang tapak.
Maayo gani kay daghan na sa mga tawo karon nga aware sa kamaayo sa biseklita kay base sa survey, mas daghan ang bike kay sa mga sakyanan sa kadalanan.
Apan gamay lang ang imong makita sa karsada kay ang atoang imprastraktura gibuhat alang sa mga sakyanan, di sa mga biseklita.
Yes, naa tuoy bike lanes, apan inutil ang local officials sa pagpabantay. Gihimo rang parking area ug makigsawo pa ang mga motorsiklo.
Bisan pa niini, ang biseklita mas maayong alternatibong sakyanan ning kalibutan nga nagtinga sa global warming.