Gisugdan na ang kulbahinam nga paugnat sa kusog alang sa mga lumolupyo sa dakbayan sa Lapu-Lapu nga gitawag og Lapu-Lapu City Fiesta League.
Pormal nga giablihan ang kompetisyon kagahapon , Septiyembre 11, nga gisugdan sa opening parade didto sa Lapu-Lapu City grounds.
Ang torneyo adunay kompetisyon sa basketball, volleyball ug softball. Koronahan ang mga kampiyon atol sa selebrasyon sa Virgen de la Regla Feast Day karong Nobiyembre.
Sa opening ceremony, gipadayag ni Mayor Junard “Ahong” Chan nga labaw sa tanan mao ang paghigalaay ug ang sportsmanship.
“There is a winner, there is a loser. Ang labing importante nga imong gipakita ang imong sportsmanship. Timan-i ang importante ang pakig-amigo, dili ang kaaway,” batbat ni Chan.
“May the best team win,” dugang niini.
Gipangulohan ni City Councilor Janvi De la Serna ug Sports Commissioner Vince Carungay ang mga aktibidad sa opening ceremony.
Human sa opening ceremony, gisugdan dayon ang basketball games sa Team Polok Squad batok Net Rippers ug Vincent Drive batok DIY Rafa Group.