Niadtong Hunyo 8, 2022, giluwatan ni Cebu Gov. Gwendolyn Garcia ang Executive Order (EO) 16 nga nagtugot sa “optional” nga pagsul-ob sa face masks sa mga komportable ug hawan nga lugar sa lalawigan sa Sugbo.
Sa Agusto 31, 2022, miluwat si Cebu City Mayor Michael Rama sa EO 5, nga nagdeklarar nga di na “mandatory” ang pagsul-ob sa face mask sa siyudad sa Sugbo, gawas lang sa medical facilities subay sa mando sa administrador ug sa mga tawo nga dunay simtomas sa flu nga mogawas sa ilang balay.
Gisugat sa mga kontrobersiya ang maong mga mando. Si Governor Gwen mibarog sa iyang mando. Si Mayor Mike miluwat og laing EO niadtong Septiyembre 5 nga nag-ingon nga ang katapusang upat ka buwan sa 2022 maoy “trial period” sa “non-obligatory” nga pagsul-ob sa face mask sa siyudad, gikan sa Septiyembre 1 hangtod Disyembre 31, 2022.
Angay na ba nga isalibay ang atong mga face mask? Ayaw usa. Tan-awa ug usisaha ang mga pulong nga gigamit. Ang kang Governor Gwen optional samtang ang kang Mayor Mike non-obligatory. Managlahi tuod apan pareho da ang gipasabot. Mahimo gihapon nga magsul-ob og face mask, apan di na pinugos.
Gawas sa paglikay sa manakod nga Covid-19, duna pay laing angay gamitan sa face mask. Mao kini ang nadiskubrehan sa mga opisyales sa Barangay Pooc, Talisay City. Gidid-an nila ang mga baho og ilok ug way kaligo sa pagmaneho og pampublikong electric tricycle (e-trike) sa ilang barangay.
Sa Oktubre 2022 pa hinuon sila magsugod sa pagpatuman sa maong ordinansa. Apan kadtong mga baho’g ilok nasayod nga di kini mawagtang sa usa lang ka buwan. Ang upan hangtod sa hangtod na. Busa magamit ug kapahimuslan pa ang mga face mask batok sa mga e-trike driver nga baho’g ilok.
Unsay silot sa ilang ordinansa? Ang masakpan sa unang higayon warningan una samtang sa ikaduha, pamultahon na og P200. Sa ikatulong pagkasakop,P1,000 ang multa dungan sa pagsakmit sa e-trike ug dalhon sa barangay aron mahisgutan ang sunod nga lakang.
Pero ingon sa “one-way” kining ordinansaha. Unsa may mahitabo kon ang pasahero maoy baho’g ilok ug way kaligo?