Nagplano ang dakbayan sa Mandaue nga pabalhinon ang mga residente nga nasulod sa three-meter easement zone sa Butuanon river human sa grabeng baha niadtong Biyernes, Septiyembre 9, 2022, tungod sa pagbunok sa uwan nga nakaanod sa dili mominos 14 ka mga balay ug namakwit ang 1,837 ka indibiduwal.
Si Buddy Alain Ybañez, pangulo sa City Disaster Risk Reduction and Management Office (CDRRMO), nibutyag niini sa SunStar Cebu kagahapon, Septiyembre 11, 2022 o duha ka adlaw gikan sa grabeng baha sa suba.
Apan si Ybañez dili pa makahatag sa detalye bahin niini.
Ang City Council gikatakda nga magtuki sa rekomendasyon sa Local Disaster Risk Reduction and Management Council (LDRRMC) sa pagdeklarar sa dakbayan nga ubos sa state of calamity atol sa ilang regular session karon, Septiyembre 12, 2022.
Ang deklarasyon maghatag og higayon sa dakbayan sa pagkuha sa calamity funds aron magamit sa paghatag og ayuda sa mga apektadong pamilya.
Si Cortes gikatakda usab nga makigtigom sa mga opisyal sa national government agencies sa pagtubag sa nagkagrabe nga baha ug pagsuyla sa mga suba sa dakbayan panahon sa pagbunok sa uwan.
Si Camelo Basaca Jr., pangulo sa Mandaue City Social Welfare Services (CSWS), nibutyag sa sayo pa nga ang ulahing baha nakaapekto sa 17 ka mga pamilya o 70 ka indibiduwal sa Barangay Paknaan, 170 ka pamilya o 650 ka indibiduwal sa Barangay Casungtingan, 57 ka pamilya o 232 ka indibiduwal sa Barangay Tabok, 146 ka pamilya o 587 ka indibiduwal sa Barangay Umapad ug 77 ka pamilya o 298 ka indibiduwal sa Barangay Tingub.