GISUSI sa City of Talisay Traffic Operations and Development Authority (CT-TODA) pinangulohan ni traffic chief Jonathan Tumulak ug sa Dept. of Public Works and Highways (DPWH) ang portion sa Toledo Wharf Road nga mas naila nga Manipis Road sa Lunes sa buntag, Septiyembre 12, 2022.
Kini human si Tumulak ni-request sa DPWH sa pagsusi sa portion sa karsada nga nag-utlan sa Brgy. Manipis ug Kampo 4, diin labing minos upat na ka mga sakyanan ang nadisgrasya sa dapit sa tulo ka buwan nga milabay.
Ang labing uwahi nga natagak sa dapit mao ang usa ka sports utility vehicle (SUV) nga nisaliring ug nahulog sa pangpang niadtong Sabado sa hapon, Septiyembre 10, 2022 nga niangol sa drayber niini nga bugtong lang nga sakay.
Nabantayan sa drayber ang kadangog sa karsada dihang siya ni-brake sa sakyanan.
Gibasol nila ni Tumulak ang nagtubod nga tubig gikan sa ibabaw sa karsada nga nisubay sa dan hinungdan sa kadangog niini, labina kon ting-uwan. (REV)