Dihay higayon nga buot unta ibaligya ang Cebu City Medical Center (CCMC) ngadto sa pribado nga kompaniya aron di na ang Kagamhanan sa Dakbayan sa Sugbo ang modumala niini. Apan napakyas ang tinguha kay daghan ang nisupak niini ilabi na ang mga lumolupyo nga nasalbar sa tambalanan.
Tungod niini, ang nagdumala sa naasoyng administrasyon napildi dihang nipasubli aron modumala na usab unta sa Cebu City Hall. Nahanaw ang plano nga ibaligya kini apan naigo ang CCMC sa linog hinungdan nga taas ang katuigan una nahibalik ang serbisyo kay nagtukod og bag-ong istruktura alang niini.
Dihang nagtungkawo sa Cebu City Hall si kanhi mayor Edgardo Labella, nahibalik ang pagtrabaho sa CCMC hangtod nga nihulip si Mayor Michael Rama nga karon nagpadayon na ang serbisyo sa katawhan sa dakbayan sa Sugbo. Dihang niigo ang pandemic, nagpadayon gihapon ang pagsilbi sa CCMC bisan kon diha lang sa buhatan sa Bureau of Fire Protection (BFP).
May tinguha karon ang administrasyon ni Rama nga i-demolish ang mga buhatan sa BFP ug Land Transportation Office (LTO) 7.
Gitukoran niini nga mga luna iyaha sa dakbayan sa Sugbo. Tukoron sa naasoyng luna ang medical arts center nga anaa niini ang lung center, diabetes center ug cancer center.
Nigahin ang Dakbayan og P120 milyones alang niini nga proyekto nga gikatakda karong tuiga sugdan sa pagtukod nga unta niadto pang 2016 sugdan apan napilde lang si Rama niadtong higayona. Gihuwat na lang ang pagpirma sa kasabutan tali sa BFP ug LTO kay aduna nay kontraktor ang proyekto ug gikatakdang buhaton ang demolisyon.
Bulahan kaayo ang mga lumolupyo sa dakbayan sa Sugbo ning proyekto nga gitinguha ni Mayor Rama kansang prayoridad ang panglawas sa mga Sugboanon. Di na unya mokuot og daghan sa ilang bulsa ang mga pasyente nga may sakit sa baga, diabetes ug cancer kay naa namay serbisyo alang kanila.
Di na sila malukop sa pagpangayo og tabang sa bisan asang ahensiya o kaha mga organisasyon kay naa na may gobyerno nga motabang kanila. Niini, mahatagan na usab sa pagtagad ang ilang panglawas. Apan, gikinahanglan nga usab nga mo-hire og daghang mga doctor nga espesyalista niini nga mga sakit unya hatagan og igong suweldo aron makatarong silag serbisyo sa ilang mga igsuong Sugboanon. (josephelvirtubilan@gmail.com)