Pagpanghadlok nga barangon aron mohubo ang babaye maoy modus sa 27 anyos nga lalaki nga nadakpan sa kapulisan sa Lungsod sa Inabanga ug mga sakop sa Provincial Anti Cyber Crime Unit (PACU) sa Probinsiya sa Bohol sa Sabado sa gabii, Septiyembre 10, 2022.
Ang mga menor de edad nga iyang gibiktima sultihan pinaagi sa text nga barangon o iyang patyon ang mga ginikanan kon di magpadala kaniya og hulagway nga hubo.
Nahibaw-an sa kapulisan nga sagad sa mga target sa suspek nga si Vincent Rainer Payos, 27, mao ang mga batan-ong babaye nga nagpangidaron og 10-16 anyos.
Gawas sa text, si Payos subli na sab nga manghulga nga ipakatap sa social media o himuon niining profile pic sa iyang account ang hubo nga hulagway sa batang babaye kon di kini makigkita kaniya.
Tungod sa maong hitabo, nadiskobrehan sa maguwang sa 13 anyos nga biktima ni Payos kay ang iyang manghud dili na ganahan mogawas sa balay nga sama sa dunay gikahadlokan.
Tungod sa kabalaka, gisusi sa maguwang ang cell phone sa manghud ug didto nahibaw-an ang mga kabuang ni Payos.
Human niini, nagpakitabang na sa kapulisan ang pamilya sa dalagita ug giplano ang entrapment operation sa Inabanga PNP ug PACU.
Ang maguwang maoy nakig chat kang Payos dihang nag send na usab ang suspek.
Wala nasayod si Payos nga nasulod na diay siya sa lit-ag sa entrapment.
Tuod man, miadto si Payos sa gawas sa balay sa biktima diin ang dalagita maoy nagsilbing giya sa kapulisan sa pagdakop sa suspek.
Pagdala kang Payos sa buhatan sa kapulisan sa lungsod sa Inabanga, didto nasuta sa taga PACU nga ang cell phone puno sa mga hulagway sa mga menor de edad nga hubo nga maoy himuong ebidensiya batok niya.
Si Payos gitanggong na sa Inabanga police.